Dili, 16 Marsu 2026 (Média Democracia) – Komandante PNTL Munisípiu Díli, Superintendente Xefe Polísia Orlando Gomes hateten, kazu abandona bebé iha Ospitál Nasionál Guido Valadares (HNGV) deskonfia envolve mós membru PNTL ida, maibé to’o agora seidauk iha konfirmasaun tanba kazu ne’e sei iha prosesu investigasaun.
Komandante PNTL Munisípiu Díli, Superintendente Xefe Polísia Orlando Gomes hatutan, Kona-bá kazu ida-ne’e deskonfia katak iha membru PNTL mós envolve, maibé ida-ne’e seidauk hatene loloos, nune’e agora halo hela prosesu investigasaun, hafoin ita bele hatene lolos.
Komandu Polísia Nasionál Timor-Leste liuhusi seksaun Vulnerable Person Unit (VPU) simu ona relatóriu husi Bebé nia Inan no sei halo investigasaun atu hatene loloos se membru PNTL ida envolve duni, komandu sei halo prosesu tuir lei.
“Ita simu ona relatóriu husi bebé nia inan ne’ebé hanesan mós suspeita JRO, depois informasaun ne’e foti tiha-nia deklarasaun hafoin haree nia prosesu investigasaun tuir mai, bainhira iha investigasaun mak membru PNTL ida ne’ebé suspeitu ba kazu ne’e tenke foti nia deklarasaun depois maka prosesu tuir mai.” Dehan Komandante PNTL Munisípiu Díli, Superintendente Xefe Polísia Orlando Gomes
Komandu PNTL Munisípiu Díli liuhusi Eskuadra Polísia Vera Kruz simu informasaun husi Doutór iha HNGV kona-bá bebe ne’ebé partu iha maternidade, no autoridade seguransa hetan informasaun iha loron 09 fulan Marsu tinan 2026, hale’u tuku 11:40 Otl ekipa patrolla to’o kedas iha HNGV hodi konfirma no observa ba situasaun ida-ne’e.
“Hafoin iha observasaun, loos duni katak bebe ida partu iha HNGV ho defisiensia, depois partu iha maternidade transfere kedas ba iha Unidade Kuidadu Intensivu (ICU) pediatriku ka labarik nian, tanba moris mai ho kondisaun defisiensia.” Informa Komandante PNTL Munisípiu Díli, Superintendente Xefe Polísia
Nia afirma, los duni suspeita JRO hanesan inan, abandona nia bebé ne’e durante semana rua iha HNGV no pessoál saúde sira mak tau matan no madre sira balun mós ba vizita.
Antes ne’e, Polisia Nasional Timor-Leste (PNTL) liuhusi Eskuadra Cristo-Rei asegura JRO ne’ebé abandona Bebé iha Hospital Nasionál Guido Valadares (HNGV), iha loron kuarta tuku 06:00 suspeitu ne’e rasik direita ba kedas Hospitál hodi koopera no entrega-an ba PNTL.
“Entaun iha momentu ne’e kedas ita lori nia ba eskuadra hodi kanaliza bebé nia ama agora ba iha VPU Munisípiu Dili, para hodi kontinua ba iha prosesu tuir mai.” Dehan Komandante Eskuadra Cristo-Rei Inspetor Xefe Polísia, Paulino de Carvalho ba jornalista sira iha nia knaar fatin, Becora, Kuarta-Feira (11/03/2026)
Inspetór Xefe Polísia ne’e informa, Bebé nia inan ne’e entrega-an hafoin akompaña notísia ne’ebé fó sai husi Média sira, iha madrugada oras tuku 06.00 TL nia ba haree nia oan (Bebé) iha HNGV nune’e polísia foti kedas nia hodi asegura iha Eskuadra Dom Aleixo. Enkuantu kazu ne’e rasik nia prosesu identifikasaun hela nune’e bele hatene kona-ba konteúdu husi problema ne’e rasik.
Reportajen : Estefania
Foto : Estefania