Oe-cusse, 30 Janeiru (Média Democracia) – Afriana Meco ho idade (17) husi Aldeia Sakato Suku Nipani Sub Rejiaun Pante Makasar, durante hala’o prosesu aprendizajen kada loron tenke hasai osan rasik hodi selu kareta tanba distansia eskola dook.
Estudante Afriana Meco hateten, duante hala’o prosesu aprendizajen iha pre-sekundariu Mahata loron tenke hasai osan $0.50 hodi selu mikrolete hodi ba eskola no tuir prosesu aprendizajen bainhira osan laiha labele ba eskola tanba ho distansia ne’ebé dook tebes.
“Ha’u eskola iha pre-sekundariu Mahata daudaun ne’e klase 8 ano. Kada loron ha’u tenke hasai osan $0.50 hodi selu mikrolete ba mai eskola, maibé kada loron ha’u ba eskola tenke gasta osan $1.00 dolar dalaruma sei presiza tan hola bee no hahan ruma hodi aguenta estomuk hodi bele tuir prosesu aprendizajen to’o remata hafoin fila ba uma.” Dehan Afriana Meco
Nia hatutan durante ne’e prosesu aprendizajen komesa iha oras tuku ida 1:00 meudia no remata prosesu aprendizajen iha tuku lima 5.00 lorokraik. Entaun iha tuku sanulu-resin ida tenke tein hotu ona nune’e ba haris prepara ba eskola, karik la prepara antes dalaruma ba eskola sempre tarde tanba distansia dook.
“Ami tenke ba hein antes mikrolete iha oras tuku 12.20 tanba husi uma ba eskola sai mikrolete iha minutu 30 nia laran foin to’o eskola, karik ami hein mikrolete mai tarde entaun ami mós eskola tarde tenke hetan sansaun husi professor sira hanesan hakneak, maibé hakrak atu sai di’ak tenke esforsu aan.” Dehan nia
Nia afirma maske durante ne’e ba eskola hodi tuir prosesu aprendizajen ho distansia ne’ebé dook maibé ida ne’e sai hanesan materia ida, tanba hakarak sai ema ne’ebé maduru tenke simu dezafiu oin-oin nune’e iha futuru sei hetan di’ak.
Esplika liután, osan ne’ebé durante ne’e nia uza hodi ba eskola kada fulan dalaruma gasta to’o $25 dolar ba leten maibé hakarak iha futuru atu sai di’ak tenke esforsu hodi hasoru obstaklu hirak ne’e hodi fahe tempu livre ajuda inan aman halo atividade ruma hodi hetan osan ituan uza ba eskola.
Reportajen : Nelfiano
Foto : Nelfiano