Dili, 07 Juñu 2025 (Média Democracia) – Artista Indonézia Nadia Vega hala’o vizita mai iha Palásiu Prezidensial no hasoru malu ho Prezidente Repúblika Jose Ramos-Horta halo intrevista badak ho Xefe Estatu, atu promove kampaña turizmu ida ne’ebé ho objetivu atu introdús liután Díli ba públiku iha indonéziu.
Nia reprezenta média Indonézia nian no hakarak hametin ligasaun entre Indonézia no Timor-Leste, hodi destaka fahe sira nia istória ba malu no enkoraja atu aumenta liután setór turizmu nian.
Remata entrevista ho Prezidente Repúblika Nadia Vega diretamete vizita mós salaun ASEAN iha Palásiu Prezidensial. Halo reportajen espesiál (SILET) iha Programa Televizaun SCTV nian. Nia kontente hare’e Timor-Leste nią preparasaun ba ASEAN no fó bemvindu ba Timor-Leste hodi sai membru Permanente iha fulan outobru 2025 mai.
Iha dadalia ho ekipa media Prezidénsia Nadia hateten, nia kontenti mai Timor-Leste no fó kontribuisaun ba festivál Tasi Fest.
“Ha’u hakarak kontribui no promove kampaña turizmu kruzadu ida entre Timor-Leste no Indonézia, foka introdús Dili ba turista Indonézia sira enkuantu hatudu mós atrasaun Indonézia nian ba sira ne’ebé iha Dili.” Hateten Nadia Vega (04/06/2025)
DJ Nadia Vega ne’ebé famozu iha Indonézia, hamutuk ho Artista sira seluk mai iha Timor-Leste hodi atua iha TasiFest 2025 iha Dili, entre loron 5 to’o 7 fulan Juñu, hodi fó kontribuisaun ba promosaun kultura, edukasaun ambientál, no kolaborasaun internasionál, liuhusi performansa musikal no projetu sosiál ne’ebé fó impaktu pozitivu ba komunidade sira.
Nia subliña katak Timor-Leste no Indonézia iha ligasaun istóriku ne’ebé metin, tanba ne’e nia espresa ninia interese iha atividade sira hanesan ne’e hodi atrai vizitante Indonézia barak liután, liu-liu bele mai haree biodiversiade oin-oin ne’ebé úniku no furak iha Tasi okos illa Timor nian.
Reportajen : Domingas
Foto : Domingas