Dili, 06 Fevereiru 2026 (Média Democracia) – Relasiona ho akontesimentu ne’ebé akontese iha Becora iha loron 02 fulan fevereiru kona-ba ema tuda ekipamentu Pezadu área Becora, Porta-voz seguransa Ministériu Interiór Superintendente Polísia, João Belo dos Reis deklara, Komandu Munisípiu Dili liuhusi Investigasaun Kriminál Detekta ona Suspeitu no ba aprezenta ona iha Tribunal.
“Komando Munisípiu Dili liuhusi parte Diresaun Servisu Investigasaun Kriminál, detekta ona ema ne’ebé tuda eksa no aprezenta ona ba tribunal.” Dehan Porta-voz Seguransa Ministériu Interiór Superintendente Polísia, João Belo dos Reis hafoin Halo Konferénsia iha Sala Multimedia Servisu Migrasaun Vila-Verde Kinta (05/02)
Antes ne’e, Polisia Nasional Timor-Leste, Komando Munisipiu Dili kaptura ona Joven nain tolu no halo kedas detensaun ba joven nain rua ne’ebé deskonfia sai autor ba kazu tuda ekipamentu pezadu iha alargamentu estrada area Bekora nian.
Komandante PNTL, Munisipiu Dili, Superientendente Xefe Polisia, Orlando Gomes informa ba jornalista sira iha loron (03/02) katak, iha duni kazu insedente ida iha ponte Maufelu ninian, bainhira kondutor tun husi eskavator ne’e halo hela servisu kait uma sira ne’ebé besik iha estrada, depois iha sidadaun balu foti fatuk tuda eskavator nia vidru rahun.
Iha akontesimentu ne’e, Autoridade Seguransa Polisia halo kedas intervensaun hodi kaptura suspeitu na’in-3 lori kedas ba iha eskuadra kristu rei hodi halo indentifikasaun no nain-2 mak konstitui ba iha arguido.
“Sira nain rua ne’ebé konstitui sai arguido, ita halo kedas detein durante oras 72, nain ida mak ita halo indentifikasaun ita husik fali ba uma, maibé nain rua mak detein ona, para halo prosesu ba oin hodi aprezenta ba tribunal.” Hatutan Superientendente, Xefe Polisia Orlando informa ba jornalista sira iha kampo Bekora, tersa-feira (03/02/2026).
Nia haktuir, suspeitu nain tolu ne’e ho inisial, AJ, SR no ida seluk seidauk hatene inisial, maibé polisia indentifika ona sira-nia indentidade. Joven nain tolu ne’e hela duni besik iha area ponte Maufelu ninian.
Orlando afirma, prezensa PNTL iha alargamentu estrada ne’e importante tebes, nune’e seguransa metin atu nune’e projeitu refere kontinua la’o nafatin ba oin.
“Ita konsidera hahalok joven sira ne’e klaru katak, bainhira tuda ona vidru rahun ne’e krime tenki halo prosesu ba oin, tanba ne’e mak ita foti kedas asaun kaptura hodi halo prosesu no detein kedas para prosesa ba iha Tribunal.” Afirma Xefe Polisia Orlando
Aleinde ne’e, iha loron Segunda 02 Fevereiru 2026 Primeiru Ministru, Kay Rala Xanana Gusmão mós tun direta iha fatin akontesimentu no nia husu ba Komandu PNTL atu prosesa lalais autór sira ne’ebé involve iha asaun krime hodi tuda rahun ekipamentu pezadu empreza Rubic Unipessoal, Lda ne’ebé utiliza hodi halo alargamentu bá estrada protokolu iha área Becora.
PM Xanana husu atu prosesa autór sira ne’e hodi hatene loloos kronolojia ho motivu no tenke responsabiliza asaun ne’ebé sira komete. Oras-ne’e daudaun PNTL detein ona autór sira iha eskuadra Becora nian hodi hein atu submete bá prosesu investigasaun.
IX Governu Konstitusionál halo alargamentu bá estrada Becora ho objetivu prinsipál atu redús engarrafamentu no hamenus problema tráfiku, tanba Becora hanesan área ho movimentu transporte públiku aas tebes.
Atu hasa’e seguransa bá motorista, ema la’o ain, aumenta kapasidade estrada atu bele simu transporte públiku barak-liu inklui hadia drainajen hodi evita inundasaun iha tempu udan, apoia dezenvolvimentu ekonómiku lokál tanba fásil-liu atu assesu bá merkadu, eskola no servisu.
Molok halo alargamentu, Governu lidera husi Primeiru Ministru rasik akompaña husi ekipa konjunta kompostu husi Ministériu Obras Públikas (MOP), Sekretaria Estadu Asuntus Toponímia no Organizasaun Urbana (SEATOU) no Autoridade Munisípiu Dili hala’o uluk sosializasaun bá populasaun iha área Becora kona-bá prosesu tomak alargamentu estrada ne’e.
Reportajen : Estefania
Foto : Pájina Ofisiál GPM