Dili, 28 Abril 2025 (Média Democracia) – Autoridade Protesaun Civil (APC) liuhusi ekipa Gabinete Relasaun Externa no Komunikasaun relata dadus semanal kona-ba akontesementu dezastre naturais iha Timor-Leste, durante semana rua nia laran, konferénsia ne’e hala’o iha salaun APC Caicoli Dili.
Tuir Gabinete Relasaun Externa no Komunikasaun (GREK), Nelson Nunes Orleans, informa katak Autoridade Protesaun Civil rejistu kazu dezastre hamutuk Ualunulu (80), iha semana rua nia laran tanba kauza husi mudansa klimatika ho tipu diferente.
“Durante semana rua ne’e nia laran iha Timor-Leste akontese tipu dezastre naturais, nune’e Autoridade Protesaun Civil rejistu kazu uma ne’ebé hetan estragu hamutuk ualunulu (80), priense kriteria nian hamutuk Ruanulu- resin-sia (29) apoiu emerjensia limanulu resin-lima (55) ema afetadu ba kazu dezastre naturais hamutuk atus-tolu sianulu-resin-neen (396) ema ne’ebé evakua hamutuk ruanulu resin-tolu (23), kazu hirak ne’ebé autoridade rejistu tanba kauza husi mudansa klimatika ne’ebé akontese iha ita nia rai.” Dehan Xefe Seksaun ba Relasaun Externa no Komunikasaun (GREK) , Nelson Nunes Orleans
Nia hatutan Dezastre ne’ebé akontese iha Munisípiu sira hanesan Munisípiu Ainaro ahi-han uma ida (1), Munisipiu Baucau anin-sobu uma hamutuk tolu (3), Munisípiu Dili anin-sobu uma 1, Munisípiu Ermera rai halai estraga uma 8, Munisípiu Likisa anin-sobu uma 3, ema mate ida (1), ema kanek na’in rua (2), Munisipiu manufahi anin-sobu uma 2, Munisípiu Viqueque anin-sobu uma rua (2) ahi-han uma ida (1), Munisípiu Manatutu anin-sobu uma 32, bee sa’e uma hamutuk sanulu resin-sia (19) rai halai estraga uma 2 no ahi-han uma 1, liga ho dezastre ne’ebé akontese ba semana rua nia laran iha Munisípiu.
“Daudaun ne’e komandu Autoridade Protesaun Civil ne’ebé destakadu iha Munisípiu hamutuk ho nia parseiru relevante fornese asistensia emerjénsia ba familia afetadu sira ba dezastre naturais hanesan ai-han no laos ai-han (Food item & non-food item). Nune’e Komandu Operasional Autoridade Protesaun Sivil Munisípiu kontinua hodi halo levantamentu detaillu kona-ba sasan ne’ebé estragu no lakon.” Dehan nia
Nia salienta tan katak Autoridade Protesaun Sivil hamutuk ho parseru sira ne’ebé desloka iha Munisípiu halo atribuisaun emerjensia no rekoperasaun tuir dadaus klasifikasaun ba iha kazu dezastre bazeia ba lei no 7/2021 20 de juñu, relasiona ho tipu dezastre ne’ebé akontese.
Esplika liután katak Autoridade Protesaun Sivil halo kedas levantamentu dadus depois halo fali reverifika fila-fali uma ne’ebé hetan estragus ba dezastre naturais tama iha tipu estragu total ka naton nune’e sei públika fali iha tempu badak atu bele halo rekoperasaun ba uma sira ne’ebé hatan estragu totál. Husu mós ba populasaun tomak atu tau matan moris neon nain nune’e bele hadook-aan husi kauza dezastre naturais.
Reportajen : Nelfiano
Foto : Nelfiano
Editor : Jp.Costa