Dili, 10 Fevereiru 2026 (Média Democracia) – Komisaun Rekrutamentu ba vaga membru PNTL foun 2025 deside halo adiamentu prova médiku ba kandidatu foun ne’ebé selesionadu na’in 400, tanba ekipamentu ne’ebé atu uza ba halo teste iha Laboratóriu Nasionál, Ospitál Nasionál Guido Valadares laiha.
Porta-vóz Komisaun Rekrutamentu ba vaga membru PNTL foun 2025 Superintendente Polísia, António da Luz hateten, tuir lolos prova médiku ba kandidatu membru PNTL na’in 400 ne’e hala’o iha tersa (10/2) to’o (20/2) maibé bainhira Depatamentu Saúde no Komandu Jerál Polísia Nasionál Timor-Leste halo tiha koordenasaun ho parte Laborátoriu Nasionál sira dehan laiha ekipamentu ba teste, tanba ne’e komisaun deside halo adiamentu teste médiku ba kandidatu sira.
“Aproveita biban ida ne’e atu informa fali ba ita-bo’ot sira hanesan semana kotuk liubá fó sai ona ba públika katak iha loron 10 ita sei hala’o teste mediku ba kandidatu 400, maibé depois parte Departamentu Saúde halo koodenasaun ho Laboratóriu Nasionál Ospitál Nasionál Guido Valadares ba konfirma katak ekipamentu ne’ebé halo teste reazente to’o agora seidauk iha.” Dehan Superintendente Polísia Antónia da Luz iha Sentru Formasaun Polísia (CFP) Comoro Segunda (09/02)
Nune’e iha biban ne’e nia apela ba públiku sira atu hein de’it informasaun husi komisaun, bainhira ekipamemtu ne’e iha ona mak komisaun rekrutamentu ba PNTL foun 2025 sei fó sai ba kandidatu sira hodi ba tuir teste médiku.
“Tanba ne’e, aproveita biban ida ne’e atu fó sai ba públiku liliu ba kandidatu sira atu bele hein to’o ekipamentu ne’e to’o ona maka ami sei informa fila-fali ba ita-boot sira atu mai tuir teste saúde.” Hatutan Superintendente Polísia Antónia da Luz
Superintendente Polísia afirma, teste médiku ba kadetes 400 ne’e komisaun rekrutamentu PNTL 2025 hadi’a sein data, signifika katak data fiksu seidauk iha.
“Nune’e ita tenke hein parte laboratóriu nian, tanba laos ita mak halo ekipamentu ne’e no sosa aimoruk ne’e, karik ita hetan ona informasaun husi Laboratótriu Nasionál kona-ba ekipamentu sira ne’e mak ami sei anunsia fali ba públiku, no espera tempu badak ekipamentu sira ne’e bele mai ona.” Afirma Superintendente Polísia
Superintendente Polísia ne’e subliña, husi Komisaun Rekrutamentu kontinua mantein fó teste médiku ba kandidatu hamutuk 400 ne’ebé públika ona iha semana kotuk no tuir rezolusaun Governu nian númeru 10/2025.
“Ba sira ne’ebé teste médiku ne’e komisaun rekrutamentu mantein nafatin númeru 400, kontinua vansa ba iha teste mediku nian, tanba bazea ba rezolusaun Governu numeru 10/2025 ne’ebé fó sai vaga presiza 400 pesoas, nune’e mak ita mantein nafatin.” Subliña Superintendente Polísia Antónia da Luz
Iha fatin hanesan Xefe Departamentu Saúde Komandu Polísia Nasionál Analita do Rêgo hatutan, oráriu teste médika ka prova médika ba kandidatu sira ne’e tuir lolos halo iha loron 10 fula Fevereiru to’o 20 fulan Fevereiru 2026, maibé ita seidauk bele halo teste, tanba ekipamentu uza ba teste seidauk to’o husi rai liur.
“Tuir konfirmasaun ne’ebé Departamentu Saúde halo ho Laborátoriu Nasionál katak fasilidade ne’ebé atu halo teste kanidatu sira ne’e seidauk to’o iha Timor, entaun ita tenke halo mudansa ba oráriu, PNTL nu’udar institusaun Estadu, ami hein de’it bainhira reazente to’o iha ne’e ami bele fó hatene data fiksu fali ba públiku.” Dehan Xefe Departamentu Saúde Komandu Polísia Nasionál Analita do Rêgo
Xefe Departamemtu hatutan, fasilidade ne’ebé uza atu halo teste ba kandidatu sira mak ho reazentes hanesan Complete Blood Count (CBC), Kimia ho reasent sira seluk. Nune’e nafatin husu ba kandidatu no publiku sira ho pasiensia hein ekipamentu ne’e to’o mai Timor mak ita sei halo teste mediku.
Reportajen : Estefania
Foto : Estefania