Bobonaru, 03 Marsu 2026 (Média Democracia) – Koordenadór Programa HIV-SIDA STI Munisípiu Bobonaro, Sidónio Gonçalves hateten, dadus Munisípiu Bobonaro hahú husi tinan 2008 to’o 2026 rejista kazu HIV-SIDA hamutuk 130, husi kazu ne’e na’in 54 lakon vida no na’in 16 halai ses husi tratamentu.
Koordenadór Programa HIV-SIDA STI hatutan, husi 130 ne’e iha 60 mak agora dadaun halo hela tratamentu, iha 54 la konsege halo tratamentu signifika katak balu mate ona laiha mundu ne’e, 16 halai ses husi tratamentu, tanba ne’e mak husu ba komunidade sira, liuliu ba juventude sira hotu atu prevene-an no hadook-an husi virus HIV-SIDA.
Koordenadór informa, iha Munisípiu Bobonaro Postu-Administrativu Balibó mak sai segundu lugar ba ema efeta moras HIV ho totál ema 25.
“Ohin ha’u esplika ona katak globalmente iha Timor Munisípiu Bobonaro, Balibó sai segundu lugar hanesan ohin dadus ha’u fó sai ona katak dadus ne’ebé rejistu ona iha servisu Saúde Munisípiu Bobonaro Postu Balibó hamutuk 25, 21 mak agora dadaun halo hela tratamentu 4 mak fila ona ba mundu seluk.” Informa Koordenadór Programa HIV-SIDA liuhusi entrevista ho jornalista Média Democracia iha ámbitu Sensibilizasaun Transmisaun Virus HIV-SIDA iha Suku Sanirin segunda ne’e (02/03/2025)
Koordenadór Programa ne’e agradese ba INCSIDA ne’ebé prezensa iha Postu-Administrativu Balibo hodi sensibiliza informasaun ba komunidade sira, espera Programa ne’e bele tama sai iha suku sira ne’ebé kobre iha Postu Balibo.
“Ami hamutuk ho INCSIDA fahe informasaun ba komunidade sira para atu oinsá bele prevene no hadook-an husi virus HIV-SIDA, tanba iha Munisípiu Bobonaro ita detekta ona ema afeta moras HIV-SIDA hamutuk 16, nune’e husu ba komunidade sira tenke evita ransu livre.” Afirma Koordenadór Programa HIV-SIDA STI Munisípiu Bobonaro, Sidónio Gonçalves
Sidónio realsa, Dever Ministériu Saúde nian atu sensibiliza no fahe informasaun ba komunidade sira, liuliu iha Munisipiu Bobonaro, tanba Munisípiu Bobonaro besik liubá fronteira ho Indonésia.
“Ita hotu hatene katak Atambua dadus HIV-SIDA sa’e makas, nune’e ita la hatene maluk sira ne’ebé tama ilegal ne’e kontaminasaun ka hadae’t ona moras HIV-SIDA ba sira ka seidauk, maibé dever Ministériu Saúde nafatin fahe informasaun ba iha komunidade sira atu evita virus HIV hodi labele aumenta iha ita Munisípiu Bobonaro.” Subliña Koordenadór Programa HIV-SIDA STI Munisípiu Bobonaro
Nia mós hato’o mensajen ba joven sira no komunidade hotu atu prevene-an sedu duke lakon kurativu, tanba ne’e nia husu ba entidade hotu atu ho konsiénsia hodi hakbesik-an ba fasilidade saúde ne’ebé besik sira hodi halo teste raan, nune’e bele hatene sira-nia estatus katak livre husi moras HIV ka lae, Tanba ne’e nia informa ba komunidade sira katak Ministériu Saúde prontu atende komunidade sira iha sentru saúde tuir oras servisu.
Reportajen : Estefania
Foto : Estefania