Dili, 17 Marsu 2025 (Média Democracia) – Asosiasaun Akadémika Estudantíl, Universidade Nasionál Timor Lorosa’e realiza konferénsia imprensa hodi manifesta sira-nia lamentasaun hasoru estrutura universidade no Asosiasaun Akademika Estudantil UNTL, ne’ebé organiza prosesu inskrisaun iha Universidade Nasional Timor Lorosa’e UNTL Tinan 2025.
Tuir porta-vós Lino Lopes Vaz haktuir katak husi estudante foun Universidade Nasional Timor Lorosa’e (UNTL), Iha Loron 31 fulan Janeiru tinan 2025 ne’ebé Ministériu Ensinu Superior Siénsia no Kultura ofisialmente publika naran hanesan admitidu.
“Ami nia naran hanesan estudante admitidu mai UNTL ho total 5.218, husi numeru ne’e mak sei koloka ba ba fakuldade 10 ne’ebé existe iha UNTL no ami estudante admitidu 2025 halo ona rezistrasaun hahu iha loron 17/02/2025 to’o loron 11 fulan Marsu no atualmente kalendariu registrasaun extende ona husi DNPP to’o 19/03/2025 husi registrasaun refere hatudu katak estudante por volta 2955 mak halo ona registrasaun iha universidade.” Haktuir porta-vóz Lino ba jornalista sira liuhusi konferénsia imprensa ne’ebé realiza iha resintu UNTL sentrál segunda ne’e
Nia dehan nu’udár estudante admitidu tinan 2025 iha Universidade Nasional Timor Lorosa’e, hakarak manifesta sira-nia lamentasaun hasoru estrutura Universidade no Asosiasaun Akademika Estudantil UNTL, ne’ebé organiza prosesu inskrisaun iha Universidade Nasional Timor Lorosa’e UNTL.
“Kriteria registrasaun iha fakuldade ami nota katak fakuldade balun halo kriteria tuir nia vontade no la tuir matadalan no regra universidade nian, Ita hotu hatene katak orsamentu ba orientasaun akademika apoia husi Universidade, tanba estudante foun selu ona osan $5 ba Universidade maibé realidade ne’ebe akontese ba estudante foun asosiasaun akademika nafatın kobra estudanti sira hodi kontribui osan iha ambitu orientasaun akademika.” Nia dehan
Nia mós salienta katak Komisaun Organizadora halo tratamentu la dignu ba estudante foun liuliu iha registrasaun fakuldade tuir lolos regra sira ne’e so bele aplika iha orientasaun akademika.
Bazeia ba situasaun sira ne’ebé mensiona iha leten, maka asosiasaun halo ona karta ba senadu jerál Universidade Nasionál Timor Lorosa’e no hasoru direita maibé to’o agora ladauk iha resposta ne’ebe klareza.
“Tanba ne’e liuhusi komunikadu imprensa ida ne’e ami hakarak to’o ba senadu jeral UNTL atu enkontru urjenti ho senadu fakuldade sira hodi avalia fila fali prosesu registrasaun ne’ebé lao iha kada fakuldade, husu ba komisaun organizadora atu halo atendimentu ida ne’ebé dignu ba estudante sira ne’ebé halo registrasaun iha fakuldade.” Nia dehan
Porta-vós ne’e husu ba komisaun organizadora atu devolve fila fali estudante foun tinan 2025 nia osan ne’ebé entrega iha ámbitu registrasaun fakuldade hanesan Fakuldade Direito, husu osan $1.00 dolar ba kartaun orientasaun, Fakuldade Filosofia husu osan $1.00 dolar ba kartaun orientasaun, Fakuldade siensias sosiais husu osan $1.00 dolar ba fundu operasiaonl, $2.00 ba kartaun orientasaun, total $3.00.
Fakuldade Enjenaria husu osan $15.00 $ ba kamizola fakuldade, $3.00 ba sapeo akadiru, $3.00 bote, $1.00 ba ai-sar, $0.50 ba kadernu no lapizera no $2.50 ba kartaun orientasaun total $25.00, Fakuldade Agrikultura husu osan ba $11.00 dolar orientasaun kampu total $11.00, Fakuldade Medisina no Siensia Saude husu osan $1.50 ba kartaun orientasaun, $ 0.50 ba kaixa Assosiasaun, $2.00, Fakuldade Turismu, Artes, Industrias kriativas no kulturais husu osan $5.00 ba bin familiar, $12.00 ba kamizola Fakuldade no $1.50 ba kartaun orientasaun total $18.50.
Fakuldade Edukasaun husu osan $8.00 ba kamizola Fakuldade, $1.00 ba sertifikadu, $0.50 ba kas Asosiasaun, $0.50 ba sirkulasaun atividade no $1.00 ba kartaun orientasaun, total $11.00, Fakuldade Siensias Exatas husu osan $12.00 dolar ba kamizola Faculdade no $5.00 dolar ba bin familiar total $17.00, Fakuldade Ekonomia no jestaun, husu osan kamizola FEG $ 15 dolar, bin familiar $ 5 dolar, no kartaun orientasaun $1.50 sent total $21.50.
Tan ne’e reprezentante Estudante admitidu tinan 2025 ne’e husu ba estrutura Universidade liuliu Magnífiku Reitor UNTL atu superviziona atividade registrasaun Fakuldade nune’e bele evita kobransa ilegal iha universidade.
Se Karik pontus hirak ne’ebé la iha resposta mak estudante foun tinan akadémiki 2025 nafatin ejiji to’o hetan desizaun ne’ebé justu ba sira.
Reportajen : Estefania
Foto : Estefania