Dili, 03 Outubru 2024 (Media Democracia) – Sekretariu Estadu Komunikasaun Sosial (SEKOMS), halo abertura ba atividade expozisaun obra estudante Departamentu Komunikasaun Sosial UNTL, papel média importante tebes ba sosiedade Timor-Leste. Atividade ne’e realiza iha Aredores FCS Caicoli
Iha Entervista Sekretariu estadu komunikasaun sosial (SEKOMS) Expedito Loro Dias Ximenes, relata katak, objetivu husi exposisaun ba obra estudante Komunikasaun Sosial nian kona-ba foto jornalismu, reportajen eskrita, dezeñu-grafiku, video, seminariu, podcast, kompetisaun nomos animasaun, ne’e hanesan mensajen eselente ba públiku no ba estudante ne’ebé dadaun ne’e aprende hela kona-ba lalaok jornalizmu nian.
“Obra jornalizmu nian ne’e hatudu liuhusi foto iha mensajen ne’ebé exelente ba publiku nomos estudante sira, ita hatene katak iha prinsipiu baziku ba jornalismu ne’e, ida mak mensajen liuhusi foto, tanba foto ne’e rasik ko’alia liafuan rihun ida duke ita hakerek iha palavra atus ida, tanba ne’e, mensajen foto ne’ebé ohin alin estudante sira fó sai iha sira nia exposisaun obra jornalistiku nian, ida ne’e parte importante ida no diak tebes, tanba ida ne’e hanesan espresaun ne’ebé ema ida hadomi nia profisaun hanesan futuru hakarak sai jornalista no minimu bele hatene kona-ba informasaun nomos valores prinsipiu jornalizmu nian hodi prepara aan atu sai matan no tilun ba iha publiku.” Hateten Expedito Ximenes.
Nia hatutan tan katak estudante departamentu Komunikasaun Sosial ne’ebé hatudu sira nia obra sira, husi obra hirak ne’e la signifika katak sira hotu sai hotu jornalista, maibé sira bele komprende kona-ba lalaok jornalismu nian, tanba jornalista ne’e vokasaun nune’e bele sai Matan, Tilun, no lian ba iha lian la’ek sira.
“Atividade ohin ne’e importante tebes ba alin estudante sira, tanba sira preparadu no kompriende kona-ba valor no forsa husi média iha nasaun ida ne’e, nune’e ita apresia tebes ba fotografia barak ne’ebé alin estudante sira halo iha espresaun ne’ebé di’ak tebes, hatudu katak sira iha vokasaun duni atu sai ema jornalista iha públiku hodi sai lian, matan no tilun ba sosiedade, tanba papel média iha tempu agora sai hanesan matan, tilun ba públiku sira, tanba iha mundu interligadu ho informasaun sirkula ho velosidade ne’ebé makas no laiha kresiliente lesensiada atu ita refleta kona-ba oinsá média atu forma iha persepsaun realidade nian liga ba ema nia karakter iha sosiedade, tanba ne’e atu komprende papel husi meiu komunikasaun sosial sira, ita presiza komprende didiak evolusaun husi tempu ba tempu.” Informa expedito
Iha fatin hanesan Diretíor Departamentu Komunikasaun Sosial UNTL, Roberto da Costa Pacheco, haktuir katak, exposisaun refere kada tinan estudante sira realiza ho objetivu atu bele aplika teoria sira ne’ebé aprende iha aula hanesan foto jornalismu nomos sira seluk, obra sira hanesan foto,Video no dezain grafiku hodi eleva koñesimentu estudante nian.
“Kada tinan Departamentu Komunikasaun Sosial halo exposisaun ba obra sientifiku ka fotografiku ba estudante sira, liu-liu iha semestre VI ba leten, liuhusi obra hirak ne’e, sei iha posiblidade ema balun hakarak sosa, bele sosa, aleinde ne’e mós ami sei ko’alia ho fakuldade, se bele obra hirak ne’e taka iha sala de auala sira ne’e hotu, atu nune’e ita bele hatene no haree katak sala de auala ne’e, iha ninia artistika. tanba ne’e husu ba estudante sira atu aproveita didiak saida mak professór sira hanorin kona-ba mundu jornalismu ninian, liu-liu iha foto jornalismu nian, tanba husi foto bele hato’o mensajen rihun ba leten, atu ema bele hatene no kompriende saida mak ema sente ka sosiedade sente hela.” Informa Diretór Departamentu Komunikasaun Sosial.
Nia esplika tan katak atividade ne’e hanesan atividade anual husi departamentu komunikasaun sosial no importantes tebes ba estudante sira bele partisipa no epresa sira nia obra liuhusi foto,video no dezeña grafiku. Atividade ne’e hala’o durante loron tolu ho atividade sira hanesan seminariu, podcast no seluk tan ne’e sei aprezenta husi estudante sira, atividade ne’e hetan partisipasaun maximu husi estudante komunikasaun UNTL no UNITAL.
Reportajen : Basilio
Foto : Basilio