Ermera, 06 Janeiru 2025 (Média Democracia) – Estudante Ensinu Sekundariu Tekniku Vokasional Mota-bandeira Atsabe Postu-Administrativu Atsabe Munisípiu Ermera husu atu aumenta tan sala de aula ba sira tanba durante ne’e uza hamutuk edifisiu EBC Atsabe nian
Iha entrevista ho estudante Juliana da Silva klase Desima Segundu (12) departamentu hateten, sente preokupasaun tebes tanba durante ne’e hanesan estudante mai aprende no uza hamutuk sala de aula EBC Atsabe nian de’it tanba sala de aula ba sira la iha no durante tuir aula ne’e uza hamutuk edifisiu EBC Atsabe nian
“Sala de aula sai hanesan preokupasaun tebes ba ami hanesan estudante sira ne’ebé hala’o hela ami nia prosesu aprendizajem tanba agora daudaun ami sei uza hamutuk sala de aula EBC Atsabe nian no durante ne’e profesor/a sira hanorin di’ak tebes hanorin tuir materia ne’ebé iha maibé preokupasaun ne’ebé ami estudante sira iha maka sala de aula la iha, entaun antes ami atu aula tenke hein estudante EBC Atsabe sira sai mak ami kontinua aula.” Lia hirak ne’e Juliana da Silva hato’o hafoin dada lia ho jornalista média Demokrasia iha Atsabe 27/12/2024
Nia hatutan durante prosesu aprendizajem sente di’ak maske sala de aula limitadu tebes maibé profesor sira hanorin di’ak tanba eskola ne’e iha departamentu rua no sira aprende no implementa tuir saida mak sira hetan husi materia hirak ne’e.
“Dezafius ne’ebé ami sempre hasoru hanesan estudante bainhira atu hala’o pratika ba materia iha tempu bailoron nian bee moos mak susar atu ami bele asesu depois problema seluk hanesan fasilidade eskola menus ba iha sanitariu sira ne’e mós menus hanesan problema basiku ne’ebé durante ne’e ami hasoru iha eskola ne’e rasik tanba ami uza de’it sala de aula EBC Atsabe nian.” Nia Informa
Estudante Juliana da Silva rekomenda husu ba parte edukasaun nomos parte governu atu haree ba iha preokupasaun ne’ebé iha, haree liubá iha halo sala de aula tanba durante ne’e hanesan estudante uza hamutuk aula EBC Atsabe nian sente ne’e hanesan preokupasaun tebes espera katak parte governu bele ajuda halo konstursaun ba sala de aula foun atu nune’e estudante sira ne’ebé atu mai fali bele uza ho hakmatek no la iha preokupasaun tan.
Reportajen : Domingas
Foto : Domingas