Dili, 17 Jullu 2025 (Média Democracia) – Estudante Universidade Nasional Timor Lorosa’e UNTL realiza konferensia imprensa hodi hato’o solidariedade ba ativista Safii Kemamang ne’ebe hetan proibisaun atu tama mai TL hafoin vizita familia iha Atambua NTT, komunikadu refere realiza iha kampus central, kinta feira semana ne’e.
Iha konferensia imprensa Porta-voz Estudante UNTL Natalizio Nunes Martins hateten, Ami estudante ativu Universidade Nasional Timor Lorosa’e UNTL, hakarak hato’o solidariedade ba ativista Safii Kemamang, ne’ebé hetan proibisaun husi Estadu Timor-Leste atu nia labele fila mai Timori-Leste, hafoin hala’o viajen ba Atambua Indonesia.
“Safii kemamang nu’udar ativista ka sujeitu prinsipal ida husi nasaun vizina indonesia, iha ne’ebé kontribui maka’as ba luta libertasaun patria no povu Timor nian iha tempu okupasaun indonesia ka regime Soehartu nian. dedikasaun ne’ebé nia halo hodi kontribui ba indepensia Timor-Leste nian, mak liuhusi envolvimentu iha organizasaun sira hanesan, Partai Rakyat Demokrat (PRD), Solidaritas Mahasiswa Indonesia Untuk Demokrasi (SMID), Solidaritas Perjuangan Rakyat Indonesia Untuk Maubere (SPRIM).” Dehan Porta-voz Estudante UNTL Natalizio Nunes Martins
Porta-voz hatutan organizasaun hirak ne’ebé nia envolve iha altura ne’eba, iha kolaborasaun di’ak ka servisu hamutuk ho Timoroan lubuk neʼebé hamahan-an iha organizasaun sira hanesan, Organizasaun Joventude Komunista Timor-Leste (OJEKTIL) Transforma ba Asosiasaun Sosialista Timor (AST) ne’ebé ikus-mai hamosu BRIGADA NEGRA, no hari’i RENETIL iha tinan-1989. Iha envolvimentu sira ne’e hotu ho nia objetivu prinsiapal atu apoiu ka kontribui ba Timor-Leste nia direitu ukun rasik-an, ho nune’e ikus mai Timor-Leste hetan nia independesia, liuhusi referendu ka konsulta popular, nu’udar país demokrátiku ida ne’ebé restaura iha loron 20 fulan maio 2002. Ho dedikasaun ne’ebé nia halo, hamutuk ho sira seluk mak ho hanoin katak Estadu Timor-Leste presiza konsidera no valoriza.
“Hanesan deklarasaun ne’ebé atual Primeiru Ministru Kayrala Xanana Gusmão iha altura ne’ebá ho kualidade nu’udar Komandante no Xefe Falintil hatete, iha momentu atribuisaun sertifikadu ba brigada negra katak, kepada kawan-kawan yang mendukung perjuangan rakyat Timor-Timur dikatakan bawah gerakan loncat dan pendudukan menaikkan kembali moral perjuangan perlawanan rakyat Timor-Timur yang sedang menurun semangatnya karna pembantaian santa-kruz serta menipisnya amunisi di gunung.” Hatutan Porta-voz Estudante UNTL Natalizio Nunes Martins
Porta-voz reafirma Infelizmente, iha loron 12 fulan jullu, kuandu nia viajen husi Atambua Indonesia fila mai Timor liuhusi postu emigrasaun Indonesia no Timor-Leste nian, ho kumprimentu ba prosedimentus legais ne’ebé vigora, maibé ikus mai hetan proibisaun husi Estadu Timor liuhusi servisu emigrasaun sem justa kausa no la autoriza nia tama mai Timor hodi hamutuk ho nia familia sira.
Hare’e ba historia no prosesu kontribuisaun sira ne’e hotu, mak ami lamenta no konsidera katak;
- Probisaun Estadu nian, ne’ebé halo hasoru Safii Kemamang liuhusi servisu emigrasaun ne’ebé hala’o ordem sem justa kausa ka la bazeia ba regras ne’ebé vigora no viola prinsipiu demokrasia ne’ebé hatur ona.
- Ami konsidera katak, proibisaun ne’ebé halo, por motivu politiku no iha tendensia ba ameasa no hahu hamate ona demokrasia iha Timor-Leste.
- Ami mós konsidera katak, Estadu desvaloriza no matan delek ba dedikasaun no kontribuisaun Safii Kemamang nian no sira seluk ne’ebé dedika ba Timor-Leste nia ukun rasik-an.
- Ami husu ba Estadu Timor-Leste liuhusi governu, atu halo politika ne’ebé justu no kontribui ba hametin no haburas valores demokratiku iha prezente no futuru ida partisipativu, asesivel no justu ba ema hotu.
- Ikus liu ami rekomenda no husu ba Estadu Timor-Leste liuhusi orgaun kompetente hanesan servisu emigrasaun iha fronteira, Ministeriu Interior no Primeiru Ministru Kayrala Xanana Gusmão, atu bele klarifika ba povu ho loos no autoriza ativista Safii Kemamang fila mai hodi hamutuk ho nia familia no oan sira iha Timor.
Reportajen : Komunikadu Imprensa
Foto : Domingas