Dili, 26 Fevereiru 2026 (Média Democracia) – Estudante Universitariu Timor-Leste (EUTL) realiza komunikadu imprensa kona-ba Tribunal Rekursu hodi halo Revogasaun Lei Pensaun Mensal Vitalisia ne’ebé seidauk iha rezultadu klaru.
Tuir Porta-voz EUTL Natalizio Nunes Martins hateten, Lei pensaun mensal vitalisia ne’e laos vontade husi partidu politika maibé ida ne’e sakrifisiu luta naruk ne’ebé harii husi povo no EUTL.
“Nune’e ita hotu hatene katak liuhusi akordu ne’ebé ita halo hasoru Parlamentu Nasional ikus mai Prezidente Republika uza nia kompetensia promulga lei refere.” Dehan Porta-voz EUTL Natalizio Nunes Martins
Porta-voz ne’e informa, benefisiaru ne’ebé hetan benefisiu ba lei refere sira la satisfaz ho saida mak povo nia hakarak, entaun sira foti desizaun kontra fali interese povo nian ne’ebé ezize ba entidade Governu no ikus mai sira husu ba Tribunal atu bele deklara inkonstituisionalidade ba lei refere. Tuir sira katak lei ne’ebé Parlamentu Nasional no Prezidente promulga tama iha ordenamentu juridiku Timorense nian, ne’e viola sira nia direitu arkiridu no viola prinsipiu konstituisional ne’ebé hatur iha konstituisaun RDTL.
“Tinan-tinan Governu sempre hasai osan ho montante 5 milhoes dolar Amerikanu para fó de’it ba benefisiariu sira, serake ita-nia estadu no povo moris iha pobreza/kiak nia laran hasoru ho kondisaun la vizaravel tebes, mas 5 milhoes dolar amerikanu ne’e tinan-tinan selu de’it ba benefisiaru sira, ha’u hanoin ita hotu la simu nomos veteranu sira la simu.” Informa Porta-voz EUTL
Porta-voz ne’e mós salienta tan, ohin EUTL konvida kamada sosial sira hotu atu ita kontinua luta hasoru Tribunal atu bele deklara konstituisionalidade ba iha revogasaun lei pensaun mensal vitalisia no lei ne’e povo hatene katak lei ne’e labele existe ona iha ita-nia rai, tanba lei refere hamosu deskriminasaun ba povo no rai doben Timor-Leste ne’ebé oras ne’e hasoru hela kondisaun mizeravel teb-tebes, tanba ne’e EUTL husu atu ita hamutuk ezize ba Tribunal para bele deklara ona konstituisionalidade no ita hotu hatene katak Tribunal deklara konstituisionalidade no inkonstituisionalidade ne’e laiha prazu.
Entretantu tendensia Tribunal aproveita silensiu povo nian hodi deklara inkonstituisionalidade, tanba ne’e lakoi akontese maka EUTL kontinua ezize ba Tribunal atu bele deklara konstituisionalidade ba revogasaun LPMV.
Reportajem : Estajiadu Marito
Foto : Marito