Dili, 09 Abril 2025 (Média Democracia) – Domingas Mesquita ho idade (65) husi Munisípiu Dili Postu-Administrativu Dom Aleixo Suku Comoro Aldeia Fomentu II, maske iha loron manas, maibé nafatin esforsu-aan hodi halo atividade negosiu ki’ik hanesan fa’an dose iha estrada ninin hodi sustenta ba presiza nian.
Negosiante Domingas Mesquita hateten, liuhusi atividade negósiu hanesan fa’an dose iha estrada ninin tanba hakarak hetan osan ituan hodi hadia moris husi mukit, nune’e labele tane lima ba ema seluk tanba ida ne’e tenke esforsu-aan halo negósiu.
“Ha’u deside kria rasik negósiu ida ne’e tanba hakarak hetan osan ituan hodi sustenta ami nia moris loron-loron maske ho idade ne’ebé boot maibé ha’u nafatin koko halo atividade ki’ik sira hanesan ne’e hodi hetan osan, bainhira tur deit iha uma susar tebes atu hetan osan.” Dehan Domingas Mesquita
Nia hatutan osan ne’ebé durante uza lori halo negósiu ki’ik ne’e uza osan rasik no balun uza osan simu husi idozu nian, nune’e deside kria negosiu ki’ik hanesan fa’an dose iha dalan ninin hodi bele hetan osan ituan responde ba presiza nian.
Maske dose ne’ebé ha’u fa’an folin ho rendimentu ki’ik, kada loron sempre folin $ 2.00 to’o 4.00 dolar tanba ami fa’an dose iha estrada ninin ami fiar de’it ba ema sira ne’ebé pinera raihenek iha mota laran mak sempre hola han lori halo servisu. Dalaruma dose folin la hotu tanba ema barak mak halo negósiu iha dalan ninin maibé nafatin agradese tanba kada loron nafatin hetan osan hodi uza ba presiza nian.” Dehan nia
Nia salienta durante halo negósiu ki’ik ne’e hanesan fa’an dose pisangoren no dose donat nune’e fasil ba ema atu hola tanba ema sira ne’ebé servisu iha mota laran hanesan pinera raihenek dadersan komesa atu halo servisu sempre mai hola matabisu.
“Uluk ha’u sei iha forsa sempre ajuda ha’u nia kaben halo servisu loron-loron pinera raihenek iha mota laran hodi buka osan maibé agora ha’u idade loos ona hanesan tur de’it iha uma ha’u senti atu moras fali tanba la book-aan entaun ha’u koko ajuda ha’u nia oan feto halo dose, nune’e bele fa’an iha estrada ninin.” Nia haktuir
Esplika kle’an liután katak maske negósiante Domingas ho idade ne’ebé boot maibé ida ne’e la sai bareira ba nia atu halo negósiu iha dalan ninin, nune’e bele hetan osan hodi sustenta ba nesesidade familia nian no haruka bei-oan sira ba estudu.
Reportajen : Nelfiano
Foto : Nelfiano
Editor : Jp.Costa