Dili, 05 Marsu 2025 (Média Democracia) – Rosantina de Jesus ho idade (50) husi Munisipiu Baucau daudaun ne’e hela iha Munisípiu Dili Postu-Administrativu Dom-Aleixu Suku Bebonuk, moris hanesan negosiante loron-loron sempre halo atividade negosiu ki’ik iha trotoar leten hodi responde ba nesesidade familia nian.
Negosiante Rosantina de Jesus hateten, durante tinan barak nia laran moris hanesan ema negosiante hodi halo atividade negosiu ki’ik, nune’e bele hetan osan ituan sustenta ba nesesidade loron-loron nian nomos haruka oan sira ba iha nivel edukasaun.
“Ha’u hanesan ema negosiante loron-loron tenke ba hola modo husi merkadu Taibesi, nune’e bele lori mai fa’an fali. Modo ne’ebé kada loron ha’u ba kompras iha merkadu Taibesi sempre lori osan $10 lae $20 dolar, modo tahan ne’ebé ha’u hola hanesan mostarda mutin no metan, fore nurak, tomate, liis no fehuk dikin nune’e ba ema bele hola lalais .”Dehan Negosiante Rosantina de Jesus
Nia hatutan modo ne’ebé nia fa’an kada loron ema hola to’o $15 lae $20 dolar maibé sei haree mós ba kondisaun tanba agora mós tempo udan hela de’it, entaun modo tahan labele folin hotu no modo sira ne’e liu loron rua komesa dodok no soe estraga tiha de’it.
“Ha’u nafatin halo negosiu ki’ik iha trotoar leten maske hasoru dezafiu oioin hanesan iha tempu udan no anin boot ha’u labele ba fa’an iha trotoar leten tanba kondisaun udan, durante ne’e ami fa’an modo uza de’it payung mak halo mahon maibé kondisaun loron ituan nafatin lori modo tahan ba fa’an nafatin nune’e bele hetan netik osan ituan hodi sustenta ba presiza loron-loron nian no haree oan sira nia eskola. Ha’u iha oan na’in tolu mane ida no feto rua, daudaun ne’e oan mane iha kaben ona no oan feto sei hala’o hela prosesu estudu iha sekundariu no univesidaden, ne’ebé daudaun ne’e ha’u tenke buka osan liuhusi dalan oioin bele hetan osan hodi haree ba ami nia presiza, tanba ha’u nia kaben agora idade boot ona laiha forsa atu halo servisu todan hodi buka osan hodi responde ba familia nia presiza”. Dehan nia
Nia afirma liuhusi kria negósiu ki’ik ida ne’e bele responde ba presiza loron-loron nian nomos haree oan sira nia eskola bainhira tur de’it iha uma sei la hetan osan, ne’eduni buat hotu atu hetan susesu iha familia uma laran tenke haka’as-aan uza maneira oioin hodi buka osan
Esplika klean liután katak Rosantina sai hanesan xefe familia tanba nia kaben ho idade boot ona ne’ebé laiha forsa atu halo servisu hodi buka osan. Maibé liuhusi kria negosiu ki’ik ida ne’e bele hetan osan ituan hodi sustenta ba nesesidade nian inklui hodi apoiu mós oan ba prosesu estudu
Reportajen : Nelfiano
Foto : Nelfiano