Dili, 19 Abril 2025 (Média Democracia) – Maregina Almira ho idade (21) husi Munisipiu Ermera daudaun ne’e hela iha Munisípiu Dili Postu-Administrativu Dom-Aleixu Suku Comoro, Tasi-Tolu João Paulo ll, moris hanesan negosiante loron-loron sempre halo atividade negosiu ki’ik iha trotoar leten hodi responde ba nesesidade nian.
Tuir negosiante Maregina Almira hateten, durante tinan barak nia laran moris hanesan ema negosiante hodi halo atividade negosiu ki’ik, nune’e bele hetan osan ituan sustenta ba nesesidade loron-loron nian no selu rasik kursu lian Korea.
“Ha’u loron-loron iha tempu dadersan tenke hader sedu hodi halo servisu uma laran nian, nune’e halo servisu hotu ha’u prepara-aan lori sasan ba fa’an iha tibar João Paulo ll nia kotuk. Ha’u fa’an sasan iha tempu dadersan to’o tuku 11.00 ha’u nia maun mai troka fa’an fali sasan ha’u fila ba uma prepara-an hodi ba tuir kursu lian Korea.” Dehan negosiante Maregina Almira
Nia hatutan kada loron ema hola sasan $5 to’o $10 dolar maibé sei haree mós situasaun no kondisaun loron-loron nian, tanba iha ema barak mak fa’an keos ki’ik iha dalan ninin hodi sustenta ba ekonomia familia.
“Sasan ne’ebé loron-loron ha’u fa’an hanesan sigaru LA, malboro, suria, bee agua, white koffie, good Day, pop mie, supermi mutin no metan. Sasan hirak ne’e mak loron-loron ha’u lori halo negosiu, maske sasan ituan maibé ha’u esforsu-aan fa’an nafatin karik tempu ba kursu ha’u tenke lori ho sigaru, nune’e kolega kursu sira bele hola.” Nia haktuir
Nia afirma bainhira tuir tuir prosesu aprendizajen ne’e remata iha tuku lima lorokraik nia tenke lao ain husi estrada ninin kursu fatin aimutin lori fa’an sigaru mai to’o uma danau lll
“Ha’u fa’an sasan ida ne’e tanba hakarak selu rasik kursu ne’ebé durante ne’e ha’u aprende, tanba fulan ida selu ho montante 10 dolar. Nune’e kada fulan ita labele husu hela de’it bai nan-aman. Ha’u nia inan aman mos moris hanesan ema agrikultor laiha forsa hodi resposde maioria ba ami nia nesesidade loron-loron nian.” Nia informa
Nia informa iha mehi ba futuru hakarak sai mós formador iha rai laran, tanba buat hotu atu sai susesu sei la fasil ne’eduni buat hotu tenke buka dalan oioin hodi aprende, nune’e ba futuru bele muda mehi ba realidade.
Esplika kle’an liután Maregina durante ne’e kria negosiu ki’ik iha dalan ninin lori osan 50 dolar hodi ba hola sasan iha loza xineza lori ba fa’an tutan fila-fali, nune’e bele hetan osan hodi sustenta ba presiza no kada fulan bele selu rasik kursu lian Korea, tanba iha futuru hakarak sai fomador ba lian Korea nian iha rai laran.
Reportajen : Nelfiano
Foto : Nelfiano