Dili, 25 Abríl 2025 (Média Democracia) – Xefe Estadu Maior Jeneral FALINTIL-Forsa Defeza Timor-Leste (F-FDTL) Tenente Jeneral Domingos Raul Falur “Rate Laek” deklara sua santidade Papa Francisco nu’udar figura ida ne’ebé lori Timor-Leste ba mapa mundu nian.
Iha entrevista ho Jeneral Falur katak ho vizita Sua Santidade Papa Francisco mai Timor-Leste nu’udar visita despedida entre Papa Francisco ho povu Timor-Leste no vizita Papa nian ne’e hodi komprova katak Timor-Leste iha fiar ne’ebé bo’ot tebes. Tanba ho falesimentu Papa Francisco ne’e Timor-Leste sente lakon tebes Papa Francisco.
“Sua Santidade Papa mai tau ita iha mapa mundu nian. Komprova katak ita ne’e iha fiar no devosaun. Nia mai ne’e hanesan ultima despedida ba ita. Nia hanesan Xefe Supremu, ita sente laran susar, maibé moris nia rohan mak ida ne’e nian iha ona Maromak nia fatin ne’ebá tanba ninian pobreza da alma. Ne’ebé ita hein katak nia bele harohan ba ita nafatin.” Lia-hirak ne’e hato’o husi Falur ba jornalista hafoin serimónia presta omenajen ba Koronél Costantino Moreira ¨Maurega¨ iha Kuartel Jenerál F-FDTL Fatuhada
Nia informa, Timor-Leste presiza fó omenajen ba falesimentu Sua Santidade Papa Francisco tanba nu’udar lider Supremu Igreja Katolika iha mundu.
“Ita haree Papa Francisco nia mesajen ikus katak nia fuan hela ho ita. Tanba ne’e ita haree iha fatin hotu-hotu sunu lilin no reza ba sua Santidade Papa Francisco no nia autoridade masimu ita-nia relijiaun nian ita laran susar mas ida ne’e ma fim husi moris.” Nia afirma
Falur salienta, espera katak Sua Santidade Papa foun mai bele kontinua halo saida mak Sua Santidade Papa Francisco halo ona, hodi kontinua sai bibi atan ne’ebé diak hodi servi ba nia sarani sira iha mundu tomak. Hein katak ida ne’ebé mai foun servi nafatin nia sarani sira iha mundu tomak.
Rekorda katak iha loron 21 fulan-abril iha oras 15:15 oras Timor-Leste Vatikanu anunsiu katak Sua Santidade Papa Francisco hakotu ona iis iha tuku 07: 35 oras Vatikanu.
Reportajen : Domingas
Foto: Ofisial pagina FALENTIL- Força Defeza de Timor-Leste
Editor : Jp.Costa