Dili, 08 Setembru 2025 (Média Democracia) – Hafoin situasaun ne’ebé sai viral iha media sosiál Facebook Prezidente Ramos-Horta halo intervensaun urgente no orienta Ekipa Unidade Serbisu Apoiu Sosiál Gabinete Prezidénsia atu ba haree direta no fó ajuda asisténsia sosiál ba aman ho oan ne’ebé iha kondisaun defisiénsia fíziku no mental, iha suku Mulo, Postu Hato-Builico Munisipiu Ainaro. Vizita ne’e iha loron 5 Fulan setembru 2025.
Difisiente Armando Amaral de Deus ho idade (49) ho kondisaun difisiente fíziku no nia oan feto Joselina de Deus ho idade (23) moris ho kondisaun defisiénsia kanek bo’ot iha kotuk laran tanba ahi-han, kondisaun ne’e grave los laiha asistensia sosiál ruma.
Iha entrevista ho Profisionál saúde Zelia da Silva de Jesus, kontratadu iha Postu Saude Mau-Chiga, konta kronologia bainhira nia hetan aman ho oan feto ho defisiénsia iha dalan ninin.
“Iha oras 17:48 lorokraik, rai komesa nakukun, bainhira ha’u fila husi servisu fatin, iha dalan ha’u hasoru avo ho alin feto ida, ne’ebé avo dada hela nia oan nia liman. Kondisaun alin feto ne’e ha’u haree hanesan la seguru no ha’u mós sente aroma la di’ak husi situasaun ne’e. Ha’u para motor no husu informasaun, ha’u nia laran sente tristi tebes hare kondisaun ne’e, entaun ha’u lori sira mai Hodi hetan tratamentu.” Dehan Profisionál saúde Zelia da Silva de Jesus
Nia hatutan, hafoin nia hato’o inisiativa atu tula avo ho nia oan ne’e ba nia uma hodi halo tratamentu medikal. Família defisíensia ne’e husu asisténsia sosial ba Ministériu Solidariedade Sosial no Inkluzaun (MSSI) no autoridade lokál, maibé seidauk responde ho atuasaun ruma.
Hafoin situasaun sira ne’e viral iha media sosial Facebook, Ohin dadérsan tuir orientasaun husi Prezidente Republika José Ramos-Horta, haruka Ekipa Prezidénsia Repúblika liuhusi Unidade Serbisu Apoiu Sosiál (SAS) hamutuk ho Doutór espesialista nain rua husi Kuba, halo vizita direta kedas ba familia ne’e iha Ainaro.
Ekipa médiku ne’ebé haruka husi Prezidente Republika fó konsulta no deside desloka ona família ne’e ba Hospital Nasionál Guido Valadares (HNGV), Dili, hodi hetan tratamentu mediku apropriadú sira nian kondisaun.
Reportajen : Domingas
Foto : Media Facebook