Dili, 08 Marsu 2025 (Média Democracia) – Banku Mundial Timor-Leste hamutuk ho feto emprezarial Timor-oan komemorasaun loron feto nian “INTERNATIONAL WOMEN’S DAY” ho “tema negósiu no judisial”, atividade ne’e realiza iha resintu Banku Mundial Timor-Leste, Sexta semana ne’e
Tuir reprezentante feto emprezarial Timor-oan, Domingas dos Santos hatete, ohin realiza atividade komemorasaun loron feto nian “INTERNATIONAL WOMEN’S DAY” atu fó parabens ba feto hotu iha Timor-Leste labele lakon oportunidade no tenke esforsu-aan maka’as kria rasik negosiu ki’ik nune’e iha futuru bele hetan susesu
“Ha’u iha esperiensia kona-ba oinsá atu sai feto forte, tanba hetan tiha independensia husi Indonésia, entaun iha 2004 nia laran ha’u forma grupu feto hamutuk ema na’in 13, ami iha hanoin kada ema ida tau osan 25 dolar total 300 dolar depois ami fó impresta ba malu halo serkulasaun to’o tinan 2008 osan total 7 mill ona, ami komesa forma ona grupu ho naran “lakon nakukun mosu naroman.” Dehan reprezentante feto emprezarial Timor-oan Domingas dos Santos
Nia hatutan relasiona ho ezistensia husi 2008 nia laran to’o ohin loron grupu lakon nakukun mosu naroman iha progresu ona ho membru to’o ona 2000 liu depois osan husi 300 sae ona ba um milaun quientus
“Grupu kooperativa ida ne’e ha’u realiza komesa husi Munisípiu Bobonaro no ha’u expansa mai Dili daudaun ne’e ba tan iha Munisípiu Ermera Gleno inklui Aileu. Bainhira grupu kooperativa ba iha Munisípiu hirak ne’e laiha failansu ruma iha tinan ida ne’e nia laran ha’u sei expansa tan ba iha Munisípiu Manufahi. Tanba ha’u hakarak kobre hodi fahe experiensia no sistema akontabilidade transparansia nomos halo di’ak ba ema kbi’it laek sira.” Dehan reprezentan emprezarial Timor-oan
Nia afirma tanba liuhusi grupu kooperativa nia moto dehan katak lakon nakukun mosu naroman ne’e atu fó naroman ba ema ne’ebé durante ne’e iha hela nakukun laran hasoru difikuldade oioin tanba grupu kooperativa ne’e nia inimigu mak ema kiak sira laiha kbi’it no forsa
Iha fatin hanesan partisipante Santina de Araujo hateten, relasiona ho komemorasaun loron INTERNATIONAL WOMEN’S DAY”, hakarak fó parabens ba feto maluk sira iha rai doben ida ne’e no feto maluk sira ne’ebé dadaun ne’e servisu hela iha rai liur
“Ha’u hakarak hato’o parabens ba feto maluk sira hotu iha rai doben ida ne’e, nomos parabens ba sira ne’ebé daudaun ne’e servisu iha rai liur, labele lakon eperansa no mentalidade atu luta hasoru obstakulu oioin, tanba liuhusi ita-nia esforsu iha futuru sei susesu ba buat hotu, feto forte nasaun mós sei forte.” Dehan partisipante Santina de Araujo
Nia hatutan iha oportunidade ida ne’e hakarak fó apresiasaun ba feto maluk sira, tanba loron ida ne’e tuir tempu atu rekoiñese feto sira nia esforsu tomak iha fatin servisu edukasaun lideransa no setor sira seluk tan
Esplika liután katak liuhusi komemorasaun loron INTERNATIONAL WOMEN’S DAY ida ne’e atu fanun feto hotu iha rai liur no rai laran labele lakon oportunidade no husik leet tempu ne’ebé laiha benefisiu, tanba ita hotu iha igualidade jeneru hotu-hotu perante iha lei nia okos.
Reportajen : Nelfiano
Foto : Nelfiano