Dili 28 Agostu 2025 (Média Democracia) – Fundasaun Mahein (FM) husu governu nain rua husi Timor-Leste ho Indonesia atu kria paz no estabilidade atu hakmatek iha área fronteira entre nasaun rua nian nune’e labele mosu dezintendimentu ruma, konferensia ne’e hala’o iha edifisio FM Bidau Bairo dos Grilos
Diretor Fundasaun Mahein FM, Nelson Belo hatete, haree ba observasaun dadaun ne’e fronteira internasional Indonesia ho Timor-Leste iha tensaun ituan tanba sidadaun Indonesia ida mate iha área fronteira Timor-Leste nian
“Ita atu reduz tensaun lori paz no hakmatek iha área fronteira ita presiza kria mekanizmu ba nasaun rua iha ida-idak nia fronteira. Nune’e FM husu ba governu nain rua hanesan Dili no Jakarta presiza kria mekanismu paz no hakmatek iha area fronteira.” Dehan Diretor Fundasaun Mahein, Nelson Belo
Diretor Fundasaun Mahein hatutan mekanizmu ne’ebé fundasaun rekomenda mak presiza loke investigasaun konjunta entre Indonesia ho Timor-Leste oinsa bele buka tuir evidensia no hamosu relatoriu transparansia ida ba akontesementu sidadaun ne’ebé mate iha fronteira.
“Kria paz no estabilidade nune’e labele mosu implikasaun ruma kona-ba relasaun bileteral governu Timor-Leste no Indonesia presiza halo atividade kultural nian. Hodi buka estratejia halo observasaun no rezolusaun konflitu iha fronteira presiza solusaun kultural.” Dehan Diretor Fundasaun Mahein
Diretor afirma área fronteira ba Nasaun rua ne’e nafatin desputa nune’e kria paz no estabilidade hodi halo esplikasaun klean ba ekipa konjuta husi Jakarta ho Dili esplika klean atraves enkontru kultural ne’ebé iha.
Iha fatin hanesan Porta-voz Superintendente Polisia, João Belo dos Reis, hatete sidadaun Indonesia ne’ebé mate deskonfia tiru ho kilat manu “senapan” nune’e kazu sei prosesu investigasaun daudau lao hela no mate isin familia hakoi ona maibé Autoridade Seguransa PNTL ho Indonesia kontinua servisu hamutuk loke prosesu ba oin
“Dadaun ne’e PNTL halo ona koordenasaun direta ho Autoridade Polisia Indonézia atu hatene komprometidu atu servisu hamutuk iha área investigasaun, hodi garante transparansia hodi partilla dadus no reforsa kooperasaun seguransa iha área fronteira.” Dehan Porta-voz Superintendente Polisia João Belo dos Reis
Porta-voz Superintendente Polisia João Belo dos Reis hatutan nu’udar Instituisaun Seguransa PNTL prioridade boot mak garante seguransa ba komunidade, kontinua hametin relasaun entre nasaun rua ne’e
Esplika liután relasiona ho sidadaun Indonesia ne’ebé mate iha área fronteira Timor-Leste nune’e husu atu kria kooperasaun ho Autoridade Seguransa Indonézia, hodi promove paz no estabilidade kona-ba ordem públiku iha fronteira rua entre Timor-Leste ho Indonesia.
Reportajen : Nelfiano
Foto : Nelfiano