Dili, 06 Fevereiru 2026 (Média Democracia) – Forum Organizasaun Naun-Governamental Timor-Leste (FONGTIL) nu’udar Mahon ba membru ONG lokál, nasionál no internasionál hamutuk 291, nune’e ohin realiza konferensia imprensa kona-ba teste ajente PNTL foun mosu familiarismu iha laran. Konferensia refere hala’o iha salaun FONGTIL Caicoli Dili sexta semana ne’e.
Porta-voz Esterlita Perreira Araujo hateten, FONGTIL hanesan komponente ida husi organizasaun sosiedade sivil iha Timor-Leste ne’ebé iha kna’ar no responsabilidade iha prosesu konstrusaun Estadu, konsolidasaun Paz no demokrasia iha Timor-Leste liuhusi mandatu haat hanesan Desaminasaun informasaun, Koordenasaun, Empoderamentu ba Membru no Advokasia.
“FONGTIL hakarak husu ba Governu liuhusi Ministeriu Interior no Komandu PNTL relasiona ho Prosesu rekrutamentu ba membru foun PNTL iha tinan 2025. Timoroan barak mak konkorre iha rekrutamentu refere no tuir hotu prosesu sira hanesan teste eskrita no fiziku liuhusi regulamentu ne’ebé estabelese husi Komisaun Rekrutamentu baze ba Diploma Ministerial N.º 17/2025 de 25 de Juñu Regulamento do Concurso Público de Admissão ao Curso de Formação de Agentes da Polícia Nacional de Timor Leste.” Dehan Porta-voz Esterlita Perreira Araujo iha konferensia imprensa
Porta-voz hatutan, iha loron 03 fulan fevereiru 2026, Komisaun Rekrutamentu PNTL liuhusi Porta-voz Sr. Antonio da Luz, anusiu lista kandidatu kadetes foun ba Publiku liuhusi fontes média Nasional sira iha Timor-Leste ho totál kandidatu rihun sanulu resin-rua atus-ualu hitunulu resin-haat (12.874).
“Husi númeru ne’e, kandidatu rihun sanulu atus-lima sianulu resin-hitu (10.597) mak APROVADU, no kandidatu rihun rua atus-rua hitunulu resin-hitu (2.277) mak LA APROVADU. Husi kandidatu aprovadu sira, Komisaun Rekrutamentu deside katak iha kandidatu hamutuk atus-haat (400) de’it maka sei tuir teste médiku. Kandidatu ho kategoria aprovadu no sira seluk sei labele tuir husi teste médiku ne’e, karik identifikadu kandidatu balun neʼebé kondisaun saúde la permite mak sei kontaktu kandidatu seluk tuir lista ne’ebé iha.” Hatutan Porta-voz Esterlita Perreira Araujo iha konferensia imprensa
Porta-voz informa, desizaun ida ne’e la justu, diskriminativu no la garantia prátika prinsipiu boa Governasaun iha Timor-Leste. Tanba la hatán ba Diploma Ministerial N.º 17/2025 de 25 de Junho hodi la hatán ba Artigu 42 alínea 1 husi Diploma ne’e rasik.
“FONGTIL ho nia Membru sira nafatin deskonfia katak prátika sira ne’e hodi hatán de’it ba Artigu 37 aline A no B ne’ebé fó Prioridade ba Jerasaun Patriota no PNTL ativu nia oan mak bele liu. Maibé Diploma Ministerial N.º17/2025 de 25 de Junho Tribunal rekursus deklara ona Inkonsituisional.” Informa Porta-voz Esterlita Perreira Araujo iha konferensia imprensa
Porta-voz relata, haree ba aktus sira ne’ebé akontese familiarizmu iha teste rekrutamentu ajente PNTL foun 2025 nune’e FONGTIL ho nia membru sira ejiji no rekomenda hodi husu Ministeriu Interior no PNTL atu halo esklaresimentu ne’ebé loos kona-ba prosesu rekrutamentu kandidatu kadetes foun.
Entertantu, husu Ministeriu Interior no PNTL imediatamente atu anula dezisaun, hodi la fó de’it teste médiku ba kandidatu na’in atus-haat (400) maibé fó oportunidade hotu ba kandidatu sira ne’ebé ho kategoria aprovadu ho nune’e la hamosu diskriminasaun iha prosesu rekrutamentu.
Esplika liután relasiona ho konferensia ne’e FONGTIL hakarak husu ba PDHJ imediatamente atu halo investigasaun ne’ebé kle’an hodi hatene tendénsia ba prátika sira ne’ebé kontra prinsipiu Boa Governasaun. Husu ba Parlamentu Nasionál Komisaun B ne’ebé trata asuntu Negósiu Estranjeiru, Defeza ho Seguransa atu halo fiskalizasaun ba prosesu rekrutamentu ne’ebé iha tendénsia kontra prinsipiu Boa Governasaun.
Reportajen : Nelfiano
Foto : Nelfiano