Dili, 24 Abril 2025 (Media Democracia) – Frente Revolucionária do Timor-Leste Independente (FRETILIN), liuhusi Sekretáriu Jerál FRETILIN, Marí Alkatiri hato’o sentimentu triste liuhusi Komunikadu Imprensa ba Sua Santidade Papa Francisco nia mate ne’ebé reprezenta lakon boot ida ba Timor-Leste.
Iha komunikadu Imprensa refere sita mós katak “Timor-Leste Tenki Kontinua Amu Papa Francisco Nia Luta Ba Igualdade”.
Liuhusi Komunikadu Imprensa ne’e hateten, ho tristeza boot Frente Revolusionaria Timor-Leste Independente (FRETILIN) simu notisia husi Vatikanu kona-ba Sua Santidade Papa Francisco nia mate, Notisia refere kontra FRETILIN no povu Timor-Leste nia espetativa.
“Tanba Amu Papa Francisco nia aparisaun públika iha loron Sábadu Santu no Domingu Paskoa hametin ema nia fiar katak maske neneik maibé Amu Papa Francisco sei hahu asumi fila fali ninia kna’ar nu’udar Lider Igreja Katólika nian nomos kontinua fanu mundo tomak atu labele haluha ema kiik no kiak sira.” Dehan Sekjer FRETELIN liuhusi komunikadu Imprensa ne’ebé Média Democracia Asesu iha loron 22 Abril 2025
Tanba ne’e FRETILIN sente Amu Papa Francisco nia mate reprezenta lakon boot ida ba Timor-Leste no umanidade tomak.
“Tinan kotuk durante nia vizita mai Timor-Leste, Amu Papa husu atu lider nasaun nian fó prioridade ba povu tomak nia moris diak no la’os ba grupo kiik ida deit nia diak, labele hases no hanehan Timor-oan sira ne’ebé kiak no kiik atu hamosu duni justisa sosiál iha rai ida ne’e.” Dehan Mari Alkatiri
Iha biban ne’e Prezidente Fretelin haktuir durante Sua Santidade Papa Francisco nia vizita iha Timor-Leste, Amu Papa Francisco husu povu Timor-Leste no lider sira promove moris diak ba ema hotu, justisa sosiál, unidade, páz no rekonsiliasaun, no tau matan ba meiu ambiente atu jerasaun sira tuir mai mós bele goja.
“Amu Papa Francisco nia vizita mai Timor-Leste la’os deit hametin liután sarani Katólika Timor-Leste nia fé, maibé mós fó hanoin atu Timor-Leste sai duni fatin iha ne’ebé ema hotu-hotu bele sente ukun rasik-aan, moris ho dignidade no hirak ne’ebé povu hili atu kaer ukun serbisu no hasai povu husi kiak, beik no mukit tuir valor sira ne’ebé FRETILIN hatúr iha 1974.” Dehan Prezidente FRETILIN Francisco Guterres Lú-Olo
Prezidente ne’e haktuir Sua Santidade Papa Francisco husik ema hotu iha momentu mundu tomak hasoru dezafiu boot.
“Mundu hasoru dezafiu boot ba garante ema tomak nia moris diak, maibé ha’u fiar katak Amu Papa Francisco nia partida sei unifika no haforsa liután povu Timor-Leste tomak atu kontinua ninia luta sira ne’ebé halo Timor-Leste sai buras liu no mundu ida ne’ebé diak liu.” Nia hakotu
Entretantu iha tinan 2020, atuál Prezidente FRETILIN neʼebé momentu ne’ebá hala’o kna’ar nu’udar Prezidente da Repúblika konvida Amu Papa Francisco mai vizita Timor-Leste, ne’ebé hetan resposta pozitivu, maibé tanba pandemia COVID-19, Amu Papa nia vizita hadia mai tinan-2024, no ida ne’e nu’udar primeiru vizita husi Papa ida hafoin Timor-Leste restaura nia independensia.
Papa Francisco nia vizita akontese iha loron 9 to’o loron 11 fulan Setembru tinan 2024, konside ho selebrasaun tinan 50 ezistensia FRETILIN nian.
Reportajen : Estefania
Foto : pájina Ofisiál Dr. Mari Alkatiri