Dili, 02 Setembru 2025 (Média Democracia) – Governu liuhusi Ministeriu Ensinu Superior siensia no kultura MESSK deklara fulan dezembru tinan 2025 sei lansa Institutu Siensia Kafe Ermera ECI iha Munisipiu Ermera.
Iha entrevista ho Ministru Ensinu Superior Siénsia no Kultura (MESSK) José Honório da Costa Pereira Jerónimo dehan, governu halo ona desizaun ba iha instituisaun refere sei sai hanesan instituisaun publiku ida ba iha futuru.
“Iha komisaun revizaun orsamentu ha’u aprezenta ona orsamentu ne’ebé sei selu ba profesor sira bainhira ita hahu no ita mós tau ona orsamentu oituan iha kapital menor atu sosa ba iha fasilidade sira ne’ebé sei uza ba iha instituisaun refere, nomos nesesidade basiku sira ne’ebé profesor no estudante sira presiza, ofisialmente sasan hirak ne’e seidauk intrega maibé bainhira prosesu sira ne’e lao los hotu ona mak sasan sira ne’e sei entrega ba no ha’u mós koalia ona ho Reitor nomos ninian membru sira katak, iha fulan dezembru sei ofisializa instituisaun ne’e no entrega institutu Kafe Ermera ne’ebá governu no governu maka sei tau matan.” Ministru Ensinu Superior Siénsia no Kultura (MESSK) José Honório da Costa Pereira Jerónimo
Nia informa, iha resolusaun fulan hirak liubá ECI sai ona hanesan instituisaun publiku ida ne’ebé iha ona governu nia liman no governu maka sei jere no haree ba iha rekursus umanu ba ECI rasik no Dosenti ho funsionariu sira ne’ebé atu servisu iha ECI hamutuk 38.
“Ita iha planu katak ba futuru governu hakarak loke instituisaun ida haree ba iha kafe de’it tanba ne’e maka iha ha’u nia vizita ba iha nasaun brazil ha’u koalia ona ho sira universidade ne’ebé iha kafé no sira nia Departamentu kona-ba siensia kafe iha brazil nomos ha’u hetan konvite ida mai husi universidade Hasanudi sira mós iha fakuldade agrikultura ne’ebé haree mos ba kafe nian tanba ne’e maka iha tempu badak ha’u sei ba vizita hodi haree no ha’u fila mai hakarak implementa ba iha institutu siensia kafe Ermera.” Ministru Ensinu Superior Siénsia no Kultura
Nia reafirma, haree ba iha kondisaun ba instituisaun refere di’ak hela tanba instituisaun ne’e iha edifisiu, iha nesesidade sira ne’ebé estudante ho dosente sira bele uza, ezemplu hanesan kadeira ho meza, sala de aula. Instituisaun refere mai husi veteranu sira no veteranu balun mós sei sai dosenti ka funsionario.
“Entaun sira veteranu dehan, duke ami loke instituisaun siensia kafe ne’e ba pribadu di’ak liu ami entrega ba governu atu nune’e governu bele tau matan hodi bele halo instituisaun ne’e sai boot liu iha future, tanba ne’e maka ECI ne’e entrega ba governu no ofisialmente sei loke iha fulan dezembru tinan ida ne’e.” Reafirma Ministru Ensinu Superior Siénsia no Kultura (MESSK) José Honório da Costa Pereira Jerónimo
Nia konklui, governu ofisialmente loke Intitutu siensia kafe Ermera ne’e iha fulan dezembru tinan 2025 no iha tinan 2026 fulan janeiru hahu ona aula nomos instituisaun ne’e sei sai instituisaun publiku no estudante sira sei estuda liubá kafe de’it. Governu tau osan ba iha institutu ne’e rasik porvolta de quatro centos mil ba iha ECI, Primeiru maka sei selu uluk profesor sira, depois sei sosa aumenta tan kapital menor balun nomos sei tau osan oituan atu hadia ba fundus infraestrutura, tanba governu tenke prepara mós dormitoriu.
Reportajen : Domingas
Foto : Domingas