Dili, 15 Janeiro 2026 (Média Democracia) – Molok atu aranka ba servisu iha Korea do Súl, Governu liuhusi Sekretáriu Estadu Formasaun Professional no Empregu (SEFOPE) asina deklarasaun ho traballadór timor oan hamutuk ema na’in ualunulu resin lima (85).
Sekretáriu Estadu Formasaun Professional no Empregu (SEFOPE) interinu, Domingos Lopes Lemos hateten, iha etapa dahuluk iha tinan 2026 governu liuhusi Sekretáriu Estadu Formasaun Profisionál no Empregu (SEFOPE) haruka traballadór Timor oan hamutuk ema na’in 85 ba servisu iha Korea do Súl.
“Ohin, ita despedida traballadór Timor oan 85 molok aranka ba servisu iha Korea Do Súl, tanba lakleur tan sira sei ba ema nia rai hodi hala’o misaun boot ne’ebé sira hili area peska, fabrika ho agrikultura.” Dehan Sekretáriu Estadu Formasaun Professional no Empregu (SEFOPE) interinu, Domingos Lopes Lemos
Iha programa no komprimisiu ne’ebé Governu da-sia kria mak kampu traballu ba sidadaun sira hotu, nune’e Governu Timor-Leste halo kooperasaun ho Governu Korea Do Súl ho di’ak liután. Governante ne’e mós dehan durante ne’e Governu Timor-Leste halo kooperasaun ka parseiru ho Governu Korea do Súl hodi fó oportunidade ba Timor-oan sira atu ba servisu iha Korea do Súl, nune’e bele hadi’a ekonomia família.
Ho pontu importante balun ne’ebé presiza fó hanoin ba traballadór Timor-oan sira hodi hakru’uk ba desizaun regra, durante hala’o sira nia misaun iha rai li’ur, hatudu dezempeñu di’ak to’o misaun remata iha Korea Do Súl.
Iha fatin hanesan Diretor Nasional Empregu Estrangeiru (DNEE) João Correia Pereira hateten, bainhira traballadór Timor-oan sira atu servisu iha Australia, Korea do Súl, Japaun nomos Nova Zelándia sempre iha ámbitu asina deklarasaun husi Governu ho traballadór Timor-oan sira.
“Ha’u relata hela dadus kona-ba traballadór Timor-oan sira ne’ebé agora atu ba servisu iha Korea do Súl hamutuk ema na’in ualunulu resin lima (85) no traballadór nain hirak ne’e mane hotu, feto laiha, nune’e mós traballador hirak ne’e servisu iha area diferente. Traballadór na’in hitunulu resin-ualu servisu iha area peska, traballdor nain haat iha area fabrika nomos traballador nain tolu iha area agrikultura.” Dehan Diretor Nasional Empregu Estrangeiru (DNEE) João Correia Pereira
Sekretáriu Estadu Formasaun Profisionál no Empregu (SEFOPE) liuhusi Diresaun Nasionál Empregu Estranjeiru (DNEE) haruka ona traballadór Timor oan hamutuk ema na’in rihun hitu atus hitu haatnulu resin haat (7.744) no traballadór Timor-oan hamutuk rihun ida haatnulu resin neen (1.046) remata ona kontratu no fila ona mai Timor-Leste.
Reportajen : Nelia
Foto : Media Officer SEFOPE