Dili, 07 Jullu 2025 (Média Democracia) – Governu liuhusi Ministériu Asuntu Kombatente Libertasaun Nasionál (MAKLN) ho Komisaun Konsellu Kombatente Libertasaun Nasionál (CCLN-sigla-portugés), lansa fatuk dahuluk ba banco do nosso futuro ba veteranu sira iha Kolmera. Serimonia lansamentu ne’e hala’o iha Kolmera Dili, Segunda feira semana ne’e.
Prezidente CCLN Vidal de Jesus ‘Riak Leman’, hateten, ohin lansa ona futuru veteranu no bele halo programa oioin husi fundu kontributivu veteranu.
“Ohin loron ne’e importante tebes hodi halo lansamentu ba Banco do Nosso futuro veteranu nian. Banku hamriik hodi atende veteranu sira ba kréditu hodi halo atividade hotu.” Dehan Prezidente CCLN, Vidal de Jesus “Riak Leman” ba jornalista sira, iha Kolmera, Dili, segunda ne’e.
Nia hatutan lansamentu ohin ne’e atu bele prepara banku ida iha futuru ba veteranu sira, bainhira funsiona ona no fasilita ona veteranu sira mak sei hanoin tan loke área pekuária, tanba aproxima ona ho Ministériu Agrikultura Peska.
“Fundu kontributivu veteranu kuaze milaun $50 ho veteranu hamutuk 27.600-resin. Entretantu osan ba konstrusaun Banku o Nosso Futuro hamutuk miliaun $5. Ne’ebé hala’o husi Companhia Nacional dos Combatentes e Veteranos, Sosiedade Anonima (CNCV, SA), Joint Venture ho Caria Timor-Leste, (CTL) ho durasaun to’o tinan ida, hahú husi fulan jullu 2025.” Hatutan Prezidente CCLN, Vidal de Jesus “Riak Leman”
Esperansa husi estabelesimentu ida-ne’e ba oin sei servisu diak liu ho parte relevante sira hodi finaliza konstrusaun banku nasional refere, depois atu bele hahu fali konstrusaun sira seluk hanesan rekomendasaun husi inan aman veteranu sira kona-ba atu harii tan edifisiu saude ba veteranu, nomos loke Universidade.
Iha fatin hanesan Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten, ohin iha ne’e hodi sai testamuña ba eventu lansamentu fatuk dahuluk ba Banku Nasionál Futuru Veteranu nian.
“Eventu ida ohin importante tebes ba nasaun ida ne’e tanba lansamentu ida ne’e atu garantia ba banku ida ba futuru, ohin ha’u lori veteranu sira nia naran hato’o agradese-wain ba ita-boot sira nia prezensa pasajen badak ne’ebé ohin ne’e la’ós fasil maibé difisil tebes. Ha’u atu dehan ba ita-boot sira labele hanoin difisil ne’e, tanba se ita hanoin hanesan ne’e servisu hotu la la’o ona.” Dehan Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”
Nia hatutan, sujestaun ne’ebé inan-aman veteranu sira husu iha momentu ne’ebá iha asuntu tolu hanesan harii banku própriu ba iha rai ida ne’e, harii ospital propriu ida, no seluk harii universidade.
“Ohin hotu-hotu iha ne’e sai ona testamuña ba lansamentu fatuk dahuluk ba sujestaun ne’ebé husi inan-aman sira nian katak harii Banku Nasionál ba futuru veteranu iha rai ida ne’e, no ohin loron konsege tau fatuk dahuluk ba konstrusaun refere.” Hatutan Ministru Asuntu Kombatente Libertasaun Nasionál (MAKLN)
Diretór Ezekutivu CNCV, Domingos do Santos Siqueiro hateten, Empreza CNCV hetan parseria ho Caria Timor-Leste ne’ebé konsultan hodi fó durasaun tempu tinan ida ba konstrusaun.
“Posivelmente ho hanoin ida katak antes tinan ida bele remata, nune’e bele fó mensajen di’ak ba veteranu sira ne’ebé kua osan. Pro-projetu ne’e iha faze rua, ida empreza kaer ne’e ba konstrusaun de’it no parte interiór husi banku ne’e kompañia seluk mak kaer.” Dehan Diretór Ezekutivu CNCV, Domingos do Santos Siqueiro
Nia hatutan akizasaun materiál ba konstrusaun ne’e iha Dili, besi ho simentu mak husi rai li’ur maibé ida-ne’e di’ak no sufisiente halais prosesu.
Entretantu partisipasaun husi lansamentu ba Banku Veteranus ne’e husi Vise- Primeiru, Ministru Ambiente Ekonomia, Governadór Banku Centrál Timor-Leste, Reprezenta Banku Mandiri, Vise-Presidente Banku Nasionál Komérsiu Timor-Leste, Sekretáriu Estadu Terras no Prioridade, Komandante Jerál Polísia Nasionál Timor-Leste, nomos reprezentante husi CCLN iha Munisípiu sira no líder lokál Kolmera.
Reportajen : Domingas
Foto : Domingas