Dili, 17 Marsu 2025 (Média Democracia) – Autoridade Protesaun Sivil liuhusi Gabinete Relasaun Externa no Komunikasaun relata dadus dezastre naturais durante semana ida, komunikadu imprensa ne’e halao iha sala APC kaikoli Dili, Segunda semana ne’e.
Iha komunikadu imprensa ne’ebé relata husi Gabinete Relasaun Externa no Komunikasaun Nelson N. de Orlaens hateten, hahu husi loron 10 to’o loron 13 fulan marsu durante semana ida iha rejiaun Timor-Leste akontesimentu tipu dezastre ne’ebé APC rejistu hanesan anin sobu-uma hamutuk sanulu-resin lima (15), rai halai estraga uma-rua, ahi han-uma ida, numeru ema afetadu ba dezastre ne’e hamutuk neennulu (60), numeru evakuasaun hamutuk uma-kain sanulu resin tolu (13) priense kriteria hamutuk sanulu resin-neen (16), durante semana ida dadus ne’ebé foti husi APC iha Munisipiu sira.
“Munisipiu sira ne’ebé hetan dezastre hanesan Munisipiu Baucau anin sobu-uma sanulu-resin ida, no ahi han-uma ida, Munisipiu Bobonaru rai halai estraga uma ida, Munisipiu Ermera anin sobu-uma tolu no rai halai estraga uma ida, Munisipiu Viqueque anin sobu-uma ida, husi dezastre naturais ne’ebé akontese no vitima afetadu sira hetan apoiu emerjensia kedas husi komandu APC sira ne’ebé destakadu iha kada Munisipiu.” Dehan Grek ba jornalista sira
Nia hatutan iha fulan abril mai APC sei halo rekooperasaun ba uma hamutuk sia-nulu resin hitu (97) ne’ebé hetan afetadu husi dezastre iha tinan kotuk nian no familia hirak ne’e hamutuk atus-haat sianulu resin-hitu (497) la inklui Munisipiu Ermera no Manatutu.
“Total dadus ne’ebé APC rekolla husi fulan janeiru to’o mai fulan ida ne’e sei iha hela prosesu verifikasaun nia laran, tanba ita hatene katak tinan kotuk ita seidauk halo rekooperasaun ba uma sira ne’ebé hetan estragus no iha tinan ida ne’e APC sei foku liubá rekooperasaun ba uma hirak ne’ebé ohin ha’u temi ona.” Hatutan Gabinete Relasaun Externa no Komunikasaun Nelson N. de Orlaens
Nafatin informasaun ba iha komunidade sira katak bainhira iha tempu udan ka anin-boot tenke salva-an ka hadook-an husi fatin risku sira, nune’e labele sai vitima ba iha dezastre refere, husu mós ba inan aman sira atu haree didiak oan ka alin sira ne’ebé halimar besik fatin risku dezastre nian.
Reportajen : Domingas
Foto : Domingas