Dili, 09 Abril 2028 (Media Democracia)- Diretór Ezekutivu Hali ba Dame (HABADA), Abel Amaral, preokupa tebes relasiona ho impresaun ne’ebé akontese no envolve husi oknum PNTL no membru F-FDTL iha loron iha Sesta loron 03 fulan Abril 2026 mosu kazu ilísitu iha área fronteira ne’ebé hatama motor RX-King ida tama mai Dili.
“Ligadu ho impresaun ne’ebé oknum PNTL ho F-FDTL komete ida ne’e ita prokupa oituan tuir lolos sira na’in rua hatene liu regra duke komunidade sira, maibé na realidade sira mak lori sasan ilegal tama mai iha rai laran.” Dehan diretor HABADA ba jornalista sira hafoin halo konferénsia imprensa iha nia Edifísiu HABADA kinta ne’e (09/04/2026)
Tanba ne’e nia parte husu ba Komandu Polísia Nasionál Timor-Leste atu loke prosesu ba oknum ba sira.
“Ita husu ba komandu na’in rua atu loke investigasaun didi’ak, se sira komete duni tenke fó sansaun ne’ebé regoru tanba ne’e aparelu estadu, se lolos sira mak fó ezemplu di’ak ba públiku la’os sira mak halo no lori sasan ilegal tama mai rai laran.” Nia esplika
Diretór ne’e fó konfiansa ba Instituisaun rua ne’e hodi halo prosesu investigasaun di’ak, maibé HABADA lakohi jeneraliza tanba personalidade inosente.
HABADA sei konsidera oknum PNTL no Membru F-FDTL ne’e sei iha suspeitu nia laran.
Abel Amaral husu ba Komandu F-FDTL no Komandu PNTL atu investiga kle’an ba suspeitu na’in rua ne’e liuhusi prosesu disiplinar.
“Husu ba Komandu na’in rua tantu F-FDTL ho PNTL atu investiga ba aktu ida ne’e, se kuandu prova tenke fó sansaun disiplinar tuir lei disiplinar ne’ebé mak parte komandu iha. Se kuandu iha indisiu kriminal tenke supmete ba iha Ministeriu Públiku atu nune’e tuir prosesu lei kriminal ne’ebé iha.” Nia afirma
Nia parte la kestiona kona-ba servisu iha fronteira falla maibé servisu seguransa integradu iha fronteira seida’uk metin.
HABADA mós husu ba Ministériu Interior, Ministerio Defeza, Komandu F-FDTL no Komandu PNTL inklui Ministeriu sira seluk ne’ebé destekada ninia pesoál sira iha fronteira atu halo graduamentu halo avaliasaun ba dezempenu tomak liu-liu sira ne’ebé destekada iha fronteira.
Iha Tersa ne’e loron 07/04/2026, Superintendente Xefe Polísia João Belo dos Reis, liuhusi konferénsia Imprensa informa, iha oras tuku 16:00, ekipa konjunta husi Servisu Nasionál Intelejensia (SNI), no F-FDTL konsege deteta movimentu transporte balun ne’ebé transporta sasan kontra bandu husi fronteira Mota-Ain tama mai iha kapitál Dili, nune’e ekipa duni tuir no konsege deteta katak soldadu husi institusaun F-FDTL balun fasilita hela tranzasaun hodi halo atividade kontra bandu.
Iha momentu ne’e kedas PNTL asegura kedan ho sasán evidensia no halo ona prosesu ho numeru NUC 0117/2026-PNSIK ne’ebé aprezenta ona ba Ministeriu Públiku.
Reportajen : Estefánia Cardoso
Foto : Pájina Ofisiál PNTL