HABADA Husu Transparensia no Salvaguarda Kualidade iha Rekrutamentu Ajente PNTL 2025

Dili, 13 Agostu 2025 (Média Democracia) – Hali ba Dame HABADA hanesan Organizasaun Sosiedade Sivil ne’ebé nia misaun halo monitorizasaun ba Governansaun Polisia no Seguransa Umanu iha Timor-Leste.

Diretor Ezekutivu Hali ba Dame Abel Amaral hateten, ohin HABADA fó sai nia avaliasaun kona-ba prosesu rekrutamentu Ajente Polisia Nasional Timor-Leste (PNTL) tinan 2025, ne’ebé regula husi Diploma Ministerial N.º 17/2025 loron 25 fulan-Juñu, reprezenta faze ida ne’ebé sensivel liu ho karga polítika iha siklu renovasaun rekursu umanu instituisaun nian.

“Kalendáriu rekrutamentu nian-ho preparasaun husi loron 5 to’o 29 fulan Agostu tinan 2025 no submisaun dokumentu entre loron 12 fulan Agostu to’o loron 9 fulan Setembru tinan 2025. Prosesu rekrutamentu Ajente PNTL ba tinan 2025, ne’ebé regula husi Diploma Ministerial N.º 17/2025, introdus sistema kuota ne’ebé determina, 20% ba PNTL nia oan sira, 20% ba veteranu nia oan sira, 20% ba feto sira no 40% ba públiku en-jeral.” Dehan Diretor Ezekutivu Hali ba Dame, Abel Amaral

Diretor Ezekutivu hatutan, enkuantu dezeña atu promove diversidade no rekoñesimentu, modelu ne’e hamosu preokupasaun públiku nian kona-ba justisa, nepotizmu no diskriminasaun-liuliu tanba kuota sira bazeia ba família, idade 18-23 no restrisaun sira estadu sivil nian, no métodu alokasaun sekuensial sira.

“Ho ida ne’e, risku xave sira ne’ebé organizasaun HABADA identifika, inklui estragu konfiansa públiku nian husi persesaun sira kona-ba “polisia família nian, Dezafiu legal sira ba kritériu restritivu sira. Posivel diminuisaun iha kualidade kandidatu nian bainhira aplikante sira ho pontuasaun aas liu esklui tuir sekuensia kuota nian. Vulnerabilidade ba irregularidade iha dokumentasaun no verifikasaun.” Hatutan Diretor Ezekutivu

Nia afirma, maske nune’e HABADA mós identifika oportunidade sira hanesan kuota espesial ba feto hodi promove di’ak liu-tan igualdade jéneru, fó onra ba veteranu sira, no hasa’e transparensia-bainhira prosesu sira aplika ho forma efetivu.

“Nune’e HABADA fó rekomendasaun prioridade ba Ministériu Interior no Komandu PNTL klarifika ba públiku kona-ba objetivu kuota nian, kritériu méritu nian liuhusi deklarasaun ofisial sira. Komisaun Rekrutamentu públika dadus rekrutamentu agregadu iha kada etapa.” Afirma Diretor Ezekutivu Hali ba Dame

Nia informa, Ministériu Interior nomeia observador independente sira hanesan PDHJ no sosiedade sivil sira atu monitoriza no fó sai kona-ba prosesu rekrutamentu nian. Ministériu Interior no Komandu PNTL halo reforma kona-ba alokasaun kuota hodi asegura proporsionalidade no limite sira pontuasaun mínimu. Ministériu Interior no Komandu PNTL halo revizaun ba restrisaun demográfika sira ba justisa no inkluzividade.

Esplika liután, HABADA rekrutamentu PNTL 2025 hanesan oportunidade renovasaun pesoal no teste konfiansa públiku. Ho komunikasaun transparente, ajustamentu tékniku, no supervizaun ne’ebé di’ak, prosesu ida-ne’e bele muda husi polémika ba modelu governasaun ida ne’ebé responsável.

Reportajen : Nelfiano

Foto : Nelfiano

Tinggalkan Balasan

Alamat email Anda tidak akan dipublikasikan. Ruas yang wajib ditandai *