Dili, 04 Abril 2025 (Média Democracia) – Ministeriu Transporte Komuniksaun liuhusi Diresaun Nasional Transporte Terrestre (DNTT), Diresaun Tranjitu Seguransa Rodaviaria (DTSR) hato’o ba publiku hahú loron 07 fulan abril 2025, husi rotunda Nicolau Lobatu to’o iha Ponte BJ Habibi labele para kareta no motor iha estrada ninin liu mentu 5 nia laran, konferensia ne’e hala’o iha kinta semana ne’e.
Diretora (DNTT) Maria Antónia Vitor da Costa hateten, Ministeriu Transporte Komuniksaun liuhusi DNTT servisu hamutuk ho DTSRN hakarak hato’o ba publiku husi loron 07 fulan abril 2025 labele para kareta no motor iha estrada publiku ho duransaun kleur hodi hamosu engrafamentu ba movimentasaun.
“Ita hotu hatene katak estrada fatin ba kareta no motor atu halo serkulasaun ho livre atu labele impede movimentasaun, rodaviaria DNTT servisu hamutuk ho Polisia Tranjitu Nasional sei komesa halo koordena ba iha dalan protokolu nian hafoin sei hala’o ba dalan sira seluk.” Dehan Diretora (DNTT) Maria Antónia Vitor da Costa
Nia hatutan, hotu-hotu hatene iha loja balun kareta no motor ne’ebé para permanente ne’e sei hamosu movimentasaun rodaviaria iha dalan publiku. tanba loron-loron kareta no motor sempre para iha estrada ninin dalaruma para to’o dalas rua to’o dalas tolu hodi hamosu engrafamentu.
“Hahú ohin ba oin relasiona ho avisu ne’ebé publika ona sei orienta no ordena rodaviaria sira atu labele para kareta no motor arbiru iha estrada ninin ho durasaun ne’ebé kleur hodi difikulta ba movimentu rodaviarian nian.” Dehan nia
Nia afirma exeptu ba parajen ne’ebé governu liuhusi Administrasaun Munisípiu Dili durante ne’e prepara ona, iha oportunidade ne’e husu ba hotu-hotu nia kontribuisaun atu nune’e neneik maibé beibeik sei ordena kareta no motor labele para iha estrada ninin ho durasaun ne’ebé kleur nune’e labele impede movimentasaun.
“Ami mós fó hanoin, iha oportunidade ida ne’e ba loja nain sira ne’ebé durante ita haree husi dadersan atividade loke loja komesam to’o lorokraik sira-nia kareta no motor sempre para permanente iha estrada ninin tanba laiha fatin parajen.” Nia informa
Nia informa husu ba loja nain sira labele para kareta no motor iha estrada publiku ho durasaun kleur. Daudaun ne’e sei halo servisu haree liubá dalan protokolu nian. Maibé iha tempu badak nia laran sei haree ba fatin sira ne’ebé durante ne’e loja nain sira sempre para kareta no motor permanente sei koordena ba malu nune’e livre ba ema hotu atu halo movimentu.
Iha fatin hanesan Diretór Diresaun Tranjitu Seguransa Rodaviaria, Superintendente Asistente Polisía, Luis da Costa hateten, DTSR hamutuk ho Diresaun Nasional Transporte Terrestre hala’o konferensia hodi relata ba publiku tomak tuir avisu ne’ebé fó sai hahú loron 7 fulan abril 2025, hotu-hotu tenke kumpri regras labele para kareta no motor iha estrada ninin ho durasaun kleur.
“Husi ohin ba sei oin DTSR no DNTT sei fó avisu antes ba motorista sira nune’e bele hatene no iha loron 7 fulan abril komesa kontrola ona ba movimentu transporte sira hotu labele para iha estrada ninin ho durasaun minutu 5 nia laran, karik para kleur liuhusi ida ne’e sei simu multa, tanba mós lei hateten ona.” Dehan Superintendente Asistente Polisía, Luis da Costa
Nia hatutan husi Polisia Nasional Timor-Leste liuhusi Diresaun Tranjitu Rodaviaria husu ba sidadaun hotu-hotu ne’ebé uza kareta no motor tenke halo koordenasaun no kolaborasaun hodi apoiu no konbribui regras refere, nune’e ba futuru labele hamosu tan engrafamentu iha estrada publiku, nune’e movimentu transporte sira hotu halo serkulasaun livre.
Esplika liután Deiresaun Nasional Transporte Terrestre hamutuk ho Diresaun Tranjitu Seguransa Rodaviaria, informa ba motorista sira hotu hahú loron 7 fulan abril husi Rontunda Nicolau Lobatu mai to’o Ponte BJ Habibi, labele para kareta ho motor ho durasaun kleur liuhusi minutu 5 nia laran bainhira la kumpre sei hetan sansaun tuir lei kodigu ba estrada iha artigu 4 katak la kumpri orden no autoridade sei selu multa ho montante 45 dolar tuir lei.
Reportajen : Nelfiano
Foto : Nelfiano