Dili, 21 Agostu 2025 (Média Democracia) – Diretór Ezekutivu Asosiasaun Hak Feliciano da Costa Araujo esperansa katak Primeiro Ministru labele hase de’it Ministeriu Agrikultura maibé presiza hase mós Ministeriu relevante sira ne’ebé durante ne’e hala’o sira nia servisu lalos. Lia hirak ne’e hato’o husi Diretor ezekutivu Asosiasaun Hak iha nia kna’ar fatin.
Nia dehan, aproveita okaziaun ne’e hakarak atu informa HAK hanesan Asosiasaun ida ne’ebé iha ninia kompetensia no mandatu oinsa maka atu halo monitorizasaun ba iha servisu sira ne’ebé durante ne’e governu hala’o ona no husi ne’ebá HAK hakarak hato’o nia hanoin balun realsiona ho monitorizasaun ne’ebé HAK halo iha ba Ministeriu relevante sira.
“Atu hateten ba iha sosiedade tomak katak durante ne’e HAK mós hala’o servisu koopera hamutuk ho Ministerio sira liuliu bainhira iha monitorizasaun diskobrementu ruma HAK informa kedas ba iha Ministeriu relevante sira hanesan iha tinan hirak liubá kotuk, ita halo dialogu nasional, ita konvida Ministru Agrikultura rasik ba halo intervensaun no abertura mós ba iha serimonia refere.” Tenik Diretór Ezekutivu Asosiasaun HAK Feliciano da Costa Araujo
Nia informa, koalia kona-ba kompetensia ne’ebe HAK iha la hanesan ho kompetensia ne’ebé Primeiru Ministru atual iha hodi hase ba nia membru sira ne’e los, tanba membru sira ne’e lidera husi Primeiru Ministru maibé atu halo fali avaliasaun ba iha sira-nia servisu ne’e hanoin katak ne’e la’ós servisu Primeiru Ministru nian hanesan mos ho HAK iha kompetensia hodi halo observasaun, HAK la’ós atu ko’alia ba fali Ministeriu relevante sira-nia servisu, maibé HAK nafatin koalia haree ba iha situasaun sira ne’ebé tós nain hasoru iha Munisipiu sira.
“Ita koalia ba iha produsaun sira ne’ebé kualidade di’ak, ita presiza haree ba iha irrigasaun ne’ebé di’ak. maibé hare ba iha realidade governu ida ne’e liuliu ba iha Ministeriu Agrikultura nian, ita bele dehan katak ne’e tama ona ba iha tinan ukun ninian klaran signifika katak tempu besik ona ba iha kampania ninian, entaun HAK atu husu to’o iha ne’ebé ona intervensaun husi Ministeriu Agrikultura nian, tanba ida ne’e ami atu hateten katak, Ami espera Primeiro Ministru bele hase mós ba Ministeriu relevante sira seluk, laos hase deit Ministeriu Agrikultura.” Informa Diretór Ezekutivu Asosiasaun HAK
Nia subliña, sira nia espetativa boot ida maka Primeiru Ministru hase ona servisu husi Ministeriu Agrikultura nian, maibé tenke hase mós ba iha Ministeriu sira seluk ne’ebé durante ne’e ita hotu observa sira-nia servisu ne’ebé seidauk hatudu progressu boot iha rai ida ne’e, ezemplu simples ida ita-nia planu estratejia 2011 to’o 2030 besik atu remata ona entaun ita haree ba iha ita-nia Primeiro Ministru mós idade avansado ona, entaun agora atu dehan durante ne’e Ministeriu Saude resolve ona problema balun ka lae, espera katak foin lalais lansamentu ba iha primeira pedra ne’e apoiu fundu husi governu japaun atu halo ospital ho andar haat ne’e bele realiza iha mandatu ida ne’e no antes mandatu ne’e remata ita bele haree ona andar.
Observasaun seluk ne’ebé HAK iha maka presiza hase mós ba iha Ministeriu Edukasaun, tanba ema sira lori kargo ne’e presiza Primeiru Ministru hase, tanba sira laos ema foun, balun ukun hahu governu anterior mai to’o governu ida ne’e, sira nafatin ukun maibé sira-nia servisu ne’e la hatudu progressu ne’ebé di’ak. Iha fali seluk mós presiza Primeiru Ministru hase ba Ministeriu Turismu, tanba to’o agora ne’e fatin turismu mós la iha, oinsa atu dada turista sira mai vizita, entaun presiza haree nomos hase netik sira laos hase Ministeriu Agrikultura de’it.
“Ohin ami mensiona Ministeriu Agrikultura ne’e, tanba ami iha deskobrementu laos ba deit iha irrigasaun nian maibé ita mós deskobre ba iha fini nian nomos oinsa maka atu bele fó asistensia ba ita-nia komunidade sira, ita hotu hatene katak foin lalais ne’e halo ona kompra sira kona-ba makina traktor, maibé to’o agora iha ne’ebé ona, ida ne’e maka sai hanesan deskobrementu ne’ebé HAK iha, no HAK presiza koalia sai no hatene kona-ba produsaun hirak maka ita hasae ona iha ita nia rai rasik.” Subliña Diretór Ezekutivu Asosiasaun Hak Feliciano da Costa Araujo
Esplika liután katan, fator determinasaun ba dezenvolvimentu nasaun nian maka Ministeiru sira hotu tenke servisu makas nune’e bele lori nasaun Timor-Leste ne’e ba oin no garantia mós povu nia moris di’ak iha nasaun ida ne’e, nune’e HAK nafatin husu ba Primeiru Ministru bele hase mós Ministeiru sira ne’ebé servisu la di’ak ka servisu la tuir dalan, atu nune’e ita nia nasaun bele ba oin.
Reportajen : Domingas
Foto : Domingas