Dili, 4 Setembru 2025 (Média Democracia) – Diretor Ezekutivu Asosiasaun Hak Feliciano da Costa Araujo husu Governu atu konsidera loron 4 fulan setembru 1999 la’os de’it loron ba fó sai resultadu maibé loron ida ne’ebé Timoroan barak maka sai vitima iha momentu anunsiu resultadu
Nia dehan foin lalais Timor-Leste selebra ona loron 30 fulan agostu hanesan loron konsulta popular ba dala ruanulu resin-neen ona, iha selebrasaun ne’e membru governu sira halo festeza no iha exposizaun boot sira ne’ebé governu lori mai iha ne’e, maibe la iha governu ida atu fó nia hanoin ka rekoñese loron 4 fulan setembru tanba iha loron ida ne’e Timoroan barak maka lakon sira nia vida no balun lakon to’o agora la hetan.
“Durante tinan ruanulu resin-neen ona ita selebra loron konsulta popular 30 fulan agostu hahu husi tinan 1999- 2025 maibé tanba saida mak ita labele selebra loron 4 fulan setembru serake loron ne’e maka anunsiu de’it resultadu, ha’u husu ba iha governu atu rekoñese loron 4 fulan setembru 1999 nian, tanba ita haree katak familia vitima sira ne’ebé lakon mate iha tempu anunsiu reslutadu ne’e sei tanis hela ba iha sira nia familia ne’ebé lakon iha momentu ne’ebá maibé governu la konsidera ida ne’e.” Dehan Diretor Ezekutivu Asosiasaun Hak Feliciano da Costa Araujo
Diretor Ezekutivu Asosiasaun Hak hatutan, loron 4 fulan setembru ne’e maluk sira husi asosiasaun vitima sira iha momentu ne’ebá selebra iha diosezes maibé ema barak maka la hatene inklui mós governu. Nune’e atu fó hanoin hikas de’it katak momentu ne’ebá problema boot mós akontese hanesan ema sunu pelabuhan, sunu iha Likisa, sunu iha Dili laran, no vitima barak maka mate iha ne’eba, no tanba saida governu sira haluha tiha ka latau konsiderasaun ba iha loron ida ne’e.
“Tempu badak sei halo rekonsilasaun maibé iha suai ne’ebá vitima ho autor sira sei buka tuir nia maluk/familia sira ne’ebé lakon iha momentu ne’eba, maibé ita-nia governu la buka tuir no la tau atensaun ba loron istoriku refere, Ha’u agradese ba Centro Nasional Chega CNC ne’ebé haree ba iha asuntu sira ne’e no buka tuir familia vitima hodi husu tuir ba ema sira ne’ebé lakon no mate iha tempu rona resultadu ne’e.” Hatutan Diretor Ezekutivu Asosiasaun Hak
Nia reafirma, husu governu atu tau atensaun ba loron 4 fulan setembru hanesan loron anunsia rezultadu ukun rasik-an nian no governu mós tenke koopera ho vitama sira hodi kria historia ne’ebé konkretu, nune’e ita-nia joven/jerasaun foun sira bele komprende didi’ak situasaun ne’ebé uluk akontese iha moimentu anunsiu rezultadu.
Reportajen : Domingas
Foto : Domingas