Dili, 01 Setembru 2025 (Média Democracia) – Iha ambitu selebrasaun loron konsulta popular 30 de agostu 1999-2025 ba dala ruanulu resin neen, asosiasaun Hak konsidera povu maka nain hodi deside ba estadu RDTL ida ne’e no la iha tan ema seluk, husi votu maka determina katak husi ninian aten brani hodi deside katak povu Timor-Leste hakarak ukun rasik-an.
Diretor Hak Feliciano da Costa Araujo hateten, hanoin aproveita okaziaun ida ne’e hodi selebra loron konsulta popular 30 de agostu 1999-2025 halo ba tinan 26 lori asosiasaun Hak nia naran hakarak hato’o liafuan simples ida katak, povu maka nain ba estadu ida ne’e no povu maka fó ninian mandatu sira ba iha lideransa sira ne’ebé kaer ukun.
“Ha’u atu dehan tan katak situasaun ida ita atu selebra loron konsulta popular ne’e bele hanoin hikas ita hotu tenke halo reflesaun ba ita nian an katak povu maka nain ba estadu ida ne’e, nune’e husu ba ita-nia nain ulun sira atu hanoin didi’ak lai no labele hanoin de’it katak ita hakarak deit povu ninian votu iha tinan lima para ita ba kaer ukun maibé ita kaer ukun tiha ita husik responsabilidade hotu, entaun husi organizasaun Hak atu dehan tan dala ida husu ba povu Timor laran nomos Timoroan sira iha rai liur, ita hotu matan moris neon nain ba haree dala ida tan ba programa sira ne’ebé ita-nia ema sira hanesan partidu politika sira ba oin atu desamina ba imi karik haree didi’ak lai antes fó imi nia votus.” Dehan Diretor Hak Feliciano da Costa Araujo
Nia hatutan, atu fó hanoin tan ba povu Timor-Leste ne’ebé namkari iha rai laran nomos rai liur iha selebrasaun ida ne’e atu fó reflesaun tan dala ida povu maka nain hodi deside ba estadu RDTL ida ne’e no la iha tan ema seluk, husi votu maka determina katak husi ninian aten brani hodi deside katak povu Timor-Leste hakarak ukun rasik-an.
“Lori Asosiasaun Hak nia naran hakarak hato’o parabens ba iha selebrasaun loron 30 de agotu konsulta popular hodi deside ba ukun rasik-an nian, parabens mós ba iha heroi sira ne’ebé luta ba ita nasaun.” Hatutan Diretor Hak
Nia informa, haree ba iha selebrasaun ida ne’e atu halo mós reflesaun ba iha dezenvolvimentu rai laran nian haree liubá diversifika ekonomia durante ne’e garantia hela ba iha petrolion nian, agora saida maka estadu halo ona hodi dezenvolve ekonomia iha rai laran.
“Setor ida ne’ebé mais importante liu iha ita-nia rai laran hodi atrai ema ninian investimentu makas mai iha ita-nia nasaun maka setor turismo ne’e presiza tau atensaun hodi investe ba iha ne’ebá selae turista barak maka mai maibé hela iha Bali Indonesia de’it sira la mai Timor, agora setor seluk ne’ebé importante liután segundu maka governu presiza hasae produsaun aihan iha ita nian rai, iha setor ne’ebé tenke mós tau antensaun ba Infraestrutura, setor Edukasaun no Saude.” Informa Diretor Hak Feliciano da Costa Araujo
Nia reafirma, husi setor tolu ne’e bele dehan katak sira bele akumula ona depois presiza mós investe boot ba, nune’e bele halo dezenvolvimento iha rai laran nomos prontu atu halo kompetisaun ho rai seluk, Aleinde ne’e mós Timor-Leste tempu besik sai ona membru Asean, tanba Timor-Leste asina ona karta ho G7+, OMK, CPLP no WTO, entaun antes ba iha membru Asean sira ne’e tenke eleva uluk kualidade ekonomia.
Reportajen : Domingas
Foto : Domingas