Dili, 22 Maiu 2025 (Média Democracia) Asosiasaun Hak hala’o seminariu nasional ho tema” direitus umanus no inkluzaun sosial” haree ba iha maluk sira ne’ebé mai ho kondisaun difisiente, seminariu nasional ne’e hala’o iha salaun Hak farol Dili.
Iha entrevista ho Diretor Asosiasaun Hak Feliciano do Santos Araujo hateten, seminariu ida ne’e hanesan kontinuasaun ida husi Asosiasaun Hak liuliu atu fahe informasaun fila-fali ba iha entidade sira mai husi lider komunitariu, sosiedade sivil, organizaun sira, nomos jornalista sira kona-ba asuntu inkluzaun sosial nomos LGBTIQ.
“Asuntu seluk atu bele hetan mós ideia ne’ebé mai husi partisipante sira no depois elabora fali ideia sira ne’e sai hanesan dokumentu rekomendasaun ida ba iha Ministeriu relevante sira oinsa atu bele integra ba iha planu estratejia sira servisu nian, asuntu seluk mós oinsa atu bele hakbiit no hametin liután kooperasaun servisu ida ne’ebé mai husi entidade hotu-hotu liga ba asuntu inkluzaun sosial nomos diversidade nian.” Dehan Diretor Asosiasaun Hak Feliciano do Santos Araujo
Nia hatutan Hak servisu firme atu ba to’o baze hanesan ohin rekomendasaun husi MSSI, ne’e Hak prontu tanba ne’e planu servisu inisiu ne’ebé Hak iha ona, tanba ne’e hanesan asosiasaun nafatin husu ba iha entidade sira hotu atu nafatin servisu hamutuk atu haree liubá iha asuntu rua ne’ebé ohin temi ona.
Iha fatin hanesan, Ministra Solidariedade Sosal no Inkluzaun MSSI Veronica das Dores hateten, primeiru hakarak agradese ba iha sosiedade sivil Hak ne’ebé konvida ona MSSI atu mai partisipa iha seminariu nasional ida ne’e importante tebes, tanba koalia liubá direitus umanus no inkluzaun sosial ba ema ho difisiensia.
“Ohin mai partisipa iha seminariu refere no abertura ba iha seminariu nasional ida ne’ebé organiza husi sosiedade sivil Hak atu haree ba iha direitus umanus nomos inkluzaun sosial ba ema ho difisiente, entaun hanesan MSSI sente seminariu ida ne’e importante tebes ba maluk partisipante sira atu bele hatene kona-ba direitus umanus nomos haree ba direitu ema ho difisiente nian.” Dehan Ministra Solidariedade Sosal no Inkluzaun MSSI Veronica das Dores
Nia hatutan durante ne’e MSSI hala’o ona servisu iha munisipiu sira nomos iha kapital Dili tanba servisu sira ne’ebé MSSI hala’o haree liubá maluk difisiente sira.
“MSSI nia servisu haree ba ema ho difisiensia sira iha nasaun Timor-Leste, ha’u atu dehan tan de’it katak ha’u laos ema foun maibé iha tempu uluk kedas ha’u servisu hamutuk ona ho kolega sira difisiensia ne’e to’o hetan kargu refere, tan ne’e ha’u hatene papel servisu saida maka ha’u sei halo ba iha maluk sira ne’ebé mai ho kondisaun difisiente, tanba ne’e ohin iha ha’u nia diskursu ha’u hateten ona katak ha’u sei fó prioridade liubá maluk sira ne’ebé mai ho kondisaun difisiente atu lidera kargu xefia sira.” Hatutan Ministra MSSI Veronica das Dores
Nia hatutan durante ne’e MSSI hala’o ona servisu barak ne’ebé haree ba iha maluk difisiente sira hanesan apoiu ekipamentu ba maluk difisiente, apoiu material balun nomos non-material, apoiu mós osan. Haree fali ba maluk sira ho kondisaun difisiente ne’ebé sei iha uma liuliu iha foho ne’e hasoru problema barak maibé MSSI nafatin buka tuir hodi fó apoiu, tanba ne’e MSSI nia servisu.
Reportajen : Domingas
Foto : Domingas