Dili, 24 Marsu 2025 (Média Democracia) – Asisténsia Legál ba Feto no Labarik (ALFELA), nu’udár organizasaun ne’ebé Fornese asistensia legal ba feto no labarik ne’ebé sai vítima ba kazu violénsia bazeia ba jéneru, iha tinan 2025 ALFELA rejista kazu Violénsia Doméstika hamutuk 112, aleinde ne’e Alfela mós fornese ona estensu legál iha vítima feto no labarik sira.
Lia-hirak ne’e hato’o husi Diretora Ezekutiva Alfela Marcelina Amaral ba Jornalista sira hafoin partisipa iha enkontru Komisaun Interministeriál iha salaun Maria Goreti, S.E.I Segunda ne’e
Diretora Ezekutiva, Marcelina Amaral informa katak iha tinan 2025 hahú husi fulan Janeiru to’o fulan Marsu tinan ne’e, Alfela rejista kazu Violénsia Doméstika hamutuk atus-ida sanulu resin-rua (112).
“Husi fulan Janeiru to’o mai iha Marsu tinan ida ne’e, ami fornese ona extensu legal ba iha vitima feto no labarik sira hamutuk atus-ida sanulu resin-rua (112), vitima feto hamutuk atus-ida sanulu resin-ida (111), no mane menor idade na’in ida (1).” Dehan Diretora Ezekutiva ALFELA
Nia afirma kazu hirak ne’e Alfela ho ekipa lori ona iha nivél Ministériu Públiku, kazu hirak ne’e maioria violénsia Doméstika, relasaun Seksuál no abuzu seksuál ba menoridade.
“Husi kazu sira ne’e kuaze lori ba nivel Ministeriu Públiku ida mak to’o ona iha tribunal iha sentru foun, nune’e ami mós reprezenta hodi akompaña vítima sira ba asesu julgamentu ba iha tribunal no kazu desijaun hamutuk ruanulu resin rua. Maioria mak kazu violensia domestika, relasaun sexual no abuzu sexual ba menor.” Afirma Nia
Diretora ne’e dehan kazu sira ne’ebé Alfela atende ne’e as liuhusi Munisípiu tolu hanesan, Dili, Baucau no Raeoa inklui Munisípiu seluk.
“Kazu sira ne’e ami atende husi Munisipiu no Raeoa, Munisipu ne’ebé aas liu mak Dili, tuir mai mak Baucau, no Treseiru mak Oecusse. Munisipiu sira seluk ba tuir tan mai parte Bobobonaro. Ita haree tuir area julgasaun tribunal ne’ebé iha. Atu haree ba ninia montante neste momentu ne’e, kada fulan Dili sempre aas tebes depois tuir mai Baucau ho Raeoa.” Dehan Nia
Nia salienta katak kazu sira ne’ebé Alfela responde ne’e kazu violénsia bazeia ba jéneru, ne’ebé akontese ba feto no labarik sira.
“Hanesan ohin ha’u dehan liu-liu mak violénsia doméstika, violasaun sexual ka inklui mós abuzu sexual ba menoridade, enkuantu ami la fornese asisténsia legal ba iha kazu disputa rai, bainhira iha kazu sira hanesan ne’e mak ba feto maluk sira hasoru.” Nia Salienta
Entretantu Alfela nia servisu haree liubá fó asisténsia legál ba vítima ne’ebé hasoru violénsia Doméstika, Krime Públiku, Violénsia Seksuál no Abuju Seksuál nomos akompaña vítima ba iha Ministériu Públiku to’o ba iha tribunal.
Reportajen : Estefania
Foto : Estefania