Dili, 24 Abril 2025 (Média Democracia) – Vigario Episkopal Pastoral Arquidiocese Dili reprezenta husi Pe. Juvito hodi derije hela Arquidiocese Dili iha Ausensia Cardeal hamutuk ho Ministeriu Administrasaun Estatal reprezenta Governu Timor-Leste nian realiza komunikadu imprensa kona-ba Misa funebre Sua Santidade Papa Francisco nian sei halo iha Dili, kamunikadu ne’e hala’o iha kuarta semana ne’e
Vigario Episkopal Pastoral Arquidiocese Dili, Padre Juvito R. de J. Araujo, hateten ohin realiza komunikadu imprensa relasiona ho orariu selebrasaun misa hodi fó homenajen ikus ba Papa Francisco nia pasajen ba internidade nian iha mundu ida ne’e.
“Ha’u hakarak komunika ba publiku katak misa funebre ba Papa Francisco sei selebra misa iha loron sabadu 26 Abril 2025 lorokraik tuku 6.00, iha Tasi-tolu. Husu mós deskulpa ba sarani hotu tanba durante ne’e rona misa sei hala’o iha loron domingu, maibé simu kamunikadu ofisial husi vaticano katak amu Papa misa funebre sei hala’o iha tuku 10.00 dadersan loron 26 fulan abril iha Roma.” Dehan Vigario Episcopal Pastoral Arquidiocese Dili, Padre Juvito R. de J. Araujo
Nia hatutan ohin igreja hamutuk ho Ministeriu Admnistrasaun Estatal hakarak hatudu nafatin ba publiku bainhira Amu Papa mai vijita Timor-Leste buat hotu governu no igreja servisu hamutuk atu simu nia vijita, maibé foin fila hikas fulan hirak liubá kotuk Amu Papa maromak bolu hikas ba nia kadunan rohan la’ek.
“Governu ho igreja sei servisu hamutuk atu halo eventu ida ne’e la’o ho diak sai eventu ne’ebé manifesta nafatin sarani hotu iha Timor-Leste ninia domin ba Amu Papa Francisco ne’ebé ho nia debilidade fizika haka’as aan mai vijita duni ita molok fila hikas ba aman domin rohan la’ek.” Dehan nia
Nia afirma iha eventu ida ne’e sarani hotu-hotu hetan konvite atu ba tuir selebrasaun misa ba amu papa nia falesimentu hodi hamutuk ho aman maromak nia kadunan santu iha mundu foun. Ne’ebé lala’ok no komportamentu ho sei lao tuir protokolu esbelese husi Ministeriu Administrasaun Estatal
Iha fatin hanesan Ministru Administrasaun Estatal (MAE) Tomas Cabral hateten governu nafatin servisu hamutuk ho igreja katoliku hodi hala’o selebrasaun misa ba funebre Amu Papa nia iha Tasi-tolu iha sabadu 26 abril 2025 tuku 6.00 lorokraik
“Lala’ok ne’ebé selebrasaun misa ba funebre ba Amu Papa nian iha Tasi-tolu Polisia mak sei organiza no kontrola sarani sira bele tama ba tuir selebrasaun misa. Aleinde ne’e kontrola mós transporte sira hotu nune’e labele hamosu engarafamentu ruma tanba ita hotu hatene se la kontrola fó impaktu ba sarani hotu atu partisipa misa ida ne’e.” Dehan Ministru Administrasaun Estatal (MAE) Tomas Cabrál
Nia hatutan iha selebrasaun misa ida ne’e sei kontribui maka’as husi média sira hodi halo transmisaun direta nune’e sarani balun iha Munisípiu la mai partisipa misa bele akompaña direta husi transmisaun refere.
Esplika liután selebrasaun misa Amu Papa Francisco nian mate sei hala’o iha Tasi-tolu iha loron sabadu 26 Abril 2025 oras tuku 6.00 lorokraik. Husu ba sarani hotu atu koopera ho autoridade ne’ebé simu ona kna’ar atu mantein orden nune’e selebrasaun misa ida ne’e bele la’o ho domin pas no estabilidade iha rai doben ida ne’e
Reportajen : Nelfiano
Foto : Nelfiano