Dili, 08 Janeiru 2025 (Média Democracia) – Vida negosiante la fasil ba ema hotu atu hala’o, maibé ida ne’e bazeia mós ba ema ida-idak nia esforsu bainhira atu susesu tenke luta hasoru dezafiu oioin tanba de’it hakarak hetan ai-han hodi sustenta ba familia nia nesesidade loron-loron.
Joanina Maia de Aroujo ho idade rua-nulu resin-hitu 27 husi Munisípiu Bobonaro Postu-Administrativu Kota-boot Suku Karabau dau-daun ne’e hela iha Dili hodi kria atividade negósiu ki’ik iha trotoar leten hodi salva ekonomia familia
“Durante tinan barak nia laran moris hanesan ema negosiante hodi halo atividade negósiu ki’ik hanesan fa’an sigaru, bee agua, pop-mie, kafé iha trotoar leten nune’e bele hetan osan ituan hodi sustenta ba nesesidade familia. Ha’u kria negósiu ki’k ne’e impresta osan husi grupu moris rasik nian ho montante 300 dolar entaun kada semana tenke setor fila-fali osan montante $13.35 to’o fulan neen nia laran.” Dehan Joanina Maia de Aroujo
Nia hatutan durante impresta osan husi gurpu moris rasik hodi halo atividade negósiu kada loron tenke esforsu aan fa’an nafatin sasan tanba iha semana ida-nia laran tenke setor ho osan montante $13.35 ba grupu moris rasik
“Tanba iha Grupu moris rasik nia moto rasik hanesan ema moras osan la moras ne’ebé hakarak ka lakoi kada semana tenke setor tuir montante ne’ebé ita impresta nune’e ba futuru ita bele impresta tan hodi halo negósiu ne’ebé boot.” Dehan nia
Nia salienta impresta osan husi gurpu moris rasik tanba iha planu hakarak kria negósiu ki’ik hodi sustenta ba nesesidade familia
“Dala uluk ha’u loke keos lori sasan ba iha uma adat nian maibé iha momentu Sua Santidade Amu Papa atu mai vizita ita-nia rain Guarda Munisipiu Dili duni ami sai husi fatin ne’ebá entaun ha’u deside mai fa’an fali sasan iha estrada boot to’o agora, no kada loron ha’u sempre hetan osan 50 dolar kuandu tempu udan hetan de’it 20 dolar mai krik tanba kondisaun.” Nia haktuir
Esplika kle’an liután katak maske Guarda Munisípiu Dili sempre mai duni beibeik maibé hanesan negósiante trotoar leten nafatin esforsu hodi halo negósiu nune’e bele hetan osan ituan hodi sustenta ba ekonomia familia no haree oan sira nia eskola.
Reportajen : Nelfiano
Foto : Nelfiano