Dili, 11 Fevereiru 2026 (Média Democracia) – Juleta da Silva ho idade haatnulu resin-sia (49) iha oan na’in lima (4) mane (1) no feto tolu (3) mai husi Munisípiu Ermera Postu-Administrativu Letefoho no dadaun ne’e hela iha Munisípiu Dili Postu Dom-Aleixu Suku Comoro Aldeia Moris foun no kria negosiu ki’ik iha dalan ninin hodi responde ba presiza loron-loron nian no haree oan sira ba eskola.
Juleta da Silva hateten, nia kaben husik hela durante tinan salunulu resin ona nune’e nia deside hodi halo atividade negósiu ki’ik hanesan fa’an ai-fuan sira inklui bua no malus hodi responde ka utiliza ba nesesidade loron-loron nian no suporta oan sira ba iha nivel unversitariu.
“Ha’u nia kaben husik hela ami kuaze tinan sanulu resin ona, maske ha’u ho ha’u nia oan sira moris mesak maibé ha’u hanesan inan prontu reponsabilidade sai lutu ba oan sira maske hasoru dezefiu oioin, maibé ha’u tenke buka maneira oioin hodi kria negosiu ki’ik hanesan fa’an sasan hanesan bua malus, lakeru fuan, abukat, tomate, aimanas nomos sasan sira seluk, nune’e bele hetan osan hodi responde ba ami nia presiza.” Dehan Juleta
Nia hatutan, sasan sira ne’ebé durante ne’e hodi halo negósiu tenke ba sosa husi ema ne’ebé mai husi Munisipiu iha merkadu teibesi no terminal Tasi-tolu, maibé daudaun ne’e hein de’it iha fatin ema ho kareta bele mai to’o iha fatin negósiu.
“Ha’u iha transporte rasik hanesan motor tiga roda ida, entaun ha’u tenke buka fali ema seluk bele lori motor, tanba ha’u sempre hola sasan $40 lae $50 dolar ba leten, tanba osan ne’ebé lori halo negósiu ne’e uza ha’u nia osan rasik, la impresta osan liuhusi estadu ka grupu ONG balun, tanba bainhira ita impresta ema seluk nia osan hodi halo negósiu semana ka fulan ita tenke setor ba sira. nune’e ha’u desidi uza rasik ha’u nia osan hodi halo negosiu.” Hatutan Juleta
Nia salenta liután katak, maske sasan ne’ebé folin ho rendimentu ne’ebé ki’ik kada loron sempre hetan osan $ 6.00 to’o 7.00 ba leten, tanba daudaun ne’e iha ema barak mak kria negósiu ki’ik iha dalan ninin hodi responde ba presiza, ne’ebé buat hotu haree de’it ba ema ida-idak nia badinas nune’e nia sasan bele folin lalais.
Esplika liután maske nia kaben husik hela sira iha tempu naruk nia laran maibé hanesan inan faluk nafatin esforsu-aan tomak hodi tau matan ba oan sira-nia presiza loron-loron nian, nune’e tenke foti desizaun hodi halo negósiu ki’ik ruma iha dalan ninin hodi bele hetan osan ituan haree ba oan sira nia eskola.
Reportajen : Nelfiano
Foto : Nelfiano