Dili, 19 Marsu 2025 (Média Democracia) – Prezidente Institutu Nasionál Kombate HIV-SIDA, Daniel Marçal haktuir katak INCSIDA iha polítika atu kontinua fahe informasaun ba iha área rurál sira, sei la haree ba distánsia dook ka dalan at.
“Ami iha polítika ida ne’ebé diak hodi ba fatin balun kareta tama la di’ak, ami la’o de’it ba, balun ba toba de’it ho kominidade sira iha foho ne’ebá, importante mak ne’e ita la’ós haree ba situasaun ka kondisaun, tanba ita hakarak komunidade bele hatene informasaun oinsa prevene-an husi virus HIV-SIDA.” Dehan Prezidente INCSIDA
Nia hatutan katak komunidade tenke informadu tanba sira ne’e risku, ita hotu hatene katak se bainhura sira la hatene kona-ba Virus HIV-SIDA, mak sira risku tebes, nune’e presiza nafatin divulga informasaun ba komunidade sira iha área remota.
Prezidente ne’e perfere, kuandu sidadaun ida hatene ona informasaun kona-ba virus refera, maibé nia afeta ba HIV ne’e la’ós kulpa ba instituisaun, maibé nia la hatene informasaun ruma mak virus ne’e kona, ne’e kulpa instituisaun nian tanba la habelar informasaun ba komunidade sira.
Prezidente Daniel Marçal afirma katak Institutu Nasionál Kombate HIV-SIDA nafatin koko sensibiliza informasaun ba komunidade sira, se karik hatene ona mak ulun tos hodi hala’o vida livre ne’e kestaun seluk ona.
“Ha’u hanoin ita koko atu hotu-hotu tenke hatene informasaun ne’e, sé hatene o mak tos, o mak lakohi ne’e kestaun seluk ida, maibé ita-nia dever mak komunidade hotu tenke iha informasaun kona-ba transmisaun no prevensaun HIV-SIDA.” Prezidente Informa
Nia dehan tanba seksu livre ne’e iha Timor barak tebes, entaun tenke partilla nafatin ba joven sira atu kuidadu, tanba buat ida ema dehan gostu no kapáz ne’e furak ohin de’it, maibé kuandu hetan susar terus ne’e iha tempu naruk tanba aimoruk laiha.
Tanba ne’e Prezidente husu ba joven tenke iha hanoin tanba HIV ne’e aimoruk laiha, nia aimoruk mak rona informasaun sira ne’e oinsa atu halo prevensaun di’ak ba saúde atu livre no hadook-an husi virus refere.
Reportajen : Estefania
Foto : Estefania