Dili, 17 Marsu 2025 (Média Democracia) – Instituto Nasional Combate Ao HIV-SIDA I.p kontinua halo sosializasaun informasaun ba estudante husi Institutu Ciensia Saude (ICS) oinsa bele prevensaun-an husi moras HIV-SIDA iha rai laran tanba joven mak kontinuador ba dezenvolvimentu iha nasaun, atividade ne’e hala’o iha Salaun INCSIDA Pante-kelapa.
Prezidente Institutu Nasional Kombate HIV-SIDA Daniel Marçal hateten, formasaun ba joven no estudante sira ne’e importante tebes tanba iha Timor-Leste barak ona mak hetan virus HIV-SIDA, nune’e bele prevene-aan husi relasaun seksual livre iha fatin oioin.
“Ita nia joven no estudante barak mesak matenek ba siensia nian maibé sei frazil iha pensamentu tanba sira halo tia buat ida uluk depois hanoin atu hadia futuru ikus, entaun hamosu ema barak daudaun ne’e afeita virus HIV. Joven barak agora kaben sedu la tau importansia ba sira nia futuru no haluhan tia inan aman nia sakrefisiu hotu.” Dehan Prezidente Institutu Nasional Kombate HIV-SIDA, Daniel Marçal
Nia hatutan joven no estudante barak fasil monu ona ba domin ne’e prejudika hodi fó influensia ba sira nia futuru tanba ne’e ohin INCSIDA hamutuk ekipa tomak hodi fahe formasaun ba estudante sira husi ICS.
“Haree ba problema hirak ne’e ohin INCSIDA hamutuk Gabinete Primeru Ministru nian oinsá atu fasilita estudante sira, oinsá prevene-aan husi HIV-SIDA, tenke hanoin futuru hodi kuidadu hahalok sira ne’ebé loron-loron bele hamonu imi nia futuru.” Dehan nia
Nia salienta husu ba estudante no joven Timor-oan tomak tenke kuidadu imi nia futuru tanba daudaun joven no estudante barak mak la hanoin atu dezenvolve didiak sira nia futuru bainhira kaben sedu ona estraga imi nia futuru. Tanba kaben sedu ne’e tempu sei barak los maibé atu buka matenek asegura imi nia futuru hahu ohin laos aban.
Iha sorin seluk reprezentante estudante ICS Domingos Soares da Silva hateten, atividade ba ida ohin ne’e di’ak tebes tanba husi parte INCSIDA kolabora ho Institutu Ciensia Saude fahe formasaun ida ne’e bele aumenta liután estudante nia koñesimentu liu-liu iha areá saude nian oinsá bele prevene-aan husi virus HIV-SIDA.
“Ha’u sente kontente tanba husi parte INCSIDA nian halo kolaborasaun ho ami nia institutu fahe formasaun hodi aumenta ami nia koñesimentu no kapasidade klean liután liu-liu iha areá saude nian no koalia liu kona-ba prevensaun moras HIV-SIDA, ita hatene katak morasa HIV-SIDA daudaun ne’e haree ba boot tebes iha Timor-Leste.” Dehan reprezentante estudante ICS, Domingos Soares da Silva
Nia hatutan haree ba dadus boot tebes iha rai doben Timor-Leste ba oin presiza halo promosaun nafatin tanba estudante mak sai autor nune’e prevene-aan husi virus HIV-SIDA iha rai laran tanba futuru importante tebes ba ema hotu.
“Hanesan reprezentan ba estudante hotu bainhira rona informasaun husi parte INCSIDA nian sei la hotu iha ne’e hanesan akademika sei lori informasaun ne’ebé ami aprende ona hodi ba fahe tutan ba komunidade sira iha areá rurál.” Dehan nia
Nia afirma liután informasaun ne’ebé aprende husi parte INCSIDA nian hanesan akademika sei ba partilla ba komunidade sira iha areá rural ne’ebé durante ne’e susar atu asesu informasaun relasiona ho virus HIV-SIDA tanba virus refere daudaun ne’e kontinua buras iha rai laran.
Espika klean liután, liuhusi formasaun ne’ebé INCSIDA fahe ba estudante sira husi Intitutu Ciensia Saude mai husi departamentu lima hanesan informajen, parteria, Ciensia abiondika laboratoriu, farmasia nomos nutrisaun.
Reportajen : Nelfiano
Foto : Nelfiano