Dili, 25 Fevereiru 2025 (Média Democracia) – Instituto Nasional Combate HIV-SIDA “Sigla portuges” kontinua fahe formasaun ba estudante Eskola 10 Dezembru Comoro, sira hamutuk atus-tolu resin, oinsá atu prevene-aan husi virus HIV-SIDA, atividade formasaun ne’e hala’o iha Segunda-Feira semana ne’e
Tuir Prezidente Institutu Nasional Kombate HIV-SIDA Daniel Marçal hateten, iha estudante barak mak afeita moras HIV, tanba dalabarak frazil iha sira-nia pensamentu hanoin iha matenek no valor di’ak maibé sira la asegura matenek hodi muda sira-nia mehi, tanba pensamentu estudante nian fraku
“Ha’u dehan estudante pensamentu frazil, tanba sira-nia hanoin ne’e hakarak atu goja lalais moris, entaun afeita ema barak kona moras HIV. Labarak feto klosan barak isin rua kaben, sedu, akontese soe bebe ne’e laos problema husi pensamentu maibé labele aplika iha sira-nia pensamentu. Ita hakarak mai reforsa sira-nia mentalidade, nune’e hodi hamosu sira-nia pensamentu di’ak. Tanba liuhusi formasaun sira hanesan ne’e bele alkansa sira futuru ne’ebé di’ak.” Dehan Prezidente Institutu Nasional Kombate HIV-SIDA, Daniel Marçal
Nia hatutan liuhusi formasaun hirak ne’e bele muda estudante no joven sira-nia pensamentu, tanba sira mak jerasaun foun no kontinuador, sira mak lori benefisiu no dezenvolvimentu ba nasaun Timor-Leste
“Maske inan aman barak esforsu la han la hemu hodi buka osan investe ba sira-nia presiza eskola, tanba hakarak asegura oan sira-nia futuru. Maibé daudaun ne’e labarik no joven barak ransu livre la hanoin ba sira-nia futuru hodi dezenvolve ba rai ida ne’e.” Dehan nia
Nai salienta liuhusi formasaun ida ne’e atu fó hanoin no konsensializa ba estudante sira nafatin eskola, maske hetan terus oioin maibé nafatin esforsu-aan, pasensia ka tahan sentimentu no gostu nune’e ba futuru bele goja moris
“Haree ba problema hirak ne’e ohin koordena ho estrutura eskola 10 de Dezembru sente problema sai hanesan kestaun ida ne’ebé importante tebes, entaun INCSIDA atu mai partilla informasaun ba estudante sira, nune’e bele aumenta koiñesimentu hodi prevene-aan husi moras HIV-SIDA iha futuru bele goja sira-nia moris.” Nia haktuir
Iha fatin hanesan reprezentante Diretor Eskola 10 de Dezembru Antonio Rangel Pinto hateten, formasaun ne’ebé INCSIDA mai fahe ba eskola liu-liu ba estudante sira ne’e importante tebes, tanba sira mak jerasaun foun, nune’e bele muda sira-nia hanoin hodi prevene-aan husi moras HIV.
“Ha’u sente formasaun ne’ebé INCSIDA fahe ba estudante sira ne’e ha’u hanoin importante tebes. Tanba ohin husi prezidente INCSIDA hateten, aimoruk ne’ebé atu halakon permanente ba virus HIV-SIDA ne’e laiha. Entaun liuhusi asaun sosial ne’ebé sira fahe formasaun ba joven no estudante sira, nune’e bele prevene-aan husi relasaun seksual livre hodi hadook-aan mos husi virus refere.” Dehan reprezentante Diretor Eskola 10 de Dezembru, Antonio Rangel Pinto
Nia hatutan husi parte eskola nian sente apresia tebes ho programa ne’ebé INCSIDA hala’o hodi fahe formasaun ba estudante sira ligasaun moras HIV-SIDA, daudaun ne’e joven no estudante barak efeita nafatin virus refere, nune’e husu parte INCSIDA ba oin tenke partilla nafatin informasaun ba joven no estudante sira, nune’e sira-nia futuru bele nabilan no furak, hodi hamosu dezenvolvimentu nasaun Timor-Leste.
Reportajen : Nelfiano
Foto : Nelfiano