Ainaro, 25 Jullu 2025 (Média Democracia) – Instituto Nasional Kombate HIV-SIDA hala’o sensibilizasaun ba moras HIV-SIDA durante loron lima iha Suku Lima Postu-Administrativu Maubisse,Munisipiu Ainaro.
Tuir Prezidente Instituto Nasional Kombate HIV-SIDA Daniel Marçal afirma, sensibilizasaun duran loron liman iha Suku lima ne’e halo komparasaun uluk no agora la hanesan tanba komunidade sira iha ona konsensia atu partisipa iha formsaun ba moras HIV-SIDA nian.
“Sosializasaun durante loron lima iha suku liman hanesan, Suku Aituto, Fatubessi, Horai kiik, Edi no ikus liu Maubisse vila, komunidade sira-nia partisipasaun maximu hodi rona informasaun kona-ba transmisaun moras HIV-SIDA. Tanba moras refere aimoruk laiha atu kurativu no ba oin sei sai sofre liután. Daudaun ne’e ita-nia governu sei fó subsidiu hela ba aimoruk hodi halo tratamentu ba moras refere, maibé to’o loron ida mak governu la fó subsidiu ba aimoruk hodi kura moras HIV-SIDA no ita sei hola rasik maka bainhira osan laiha ona atu sosa aimoruk ita bele hein mate deit, tanba dadaun ne’e kazu ba moras HIV-SIDA ne’e rejistu iha Ministeriu Saúde hamutuk rihun-rua atus-tolu resin. Husi kazu rihun-rua atus-tolu resin ne’e transmisaun husi relasaun sexual maka imajina Timor-Leste hanusa ona tanba ita labele kontrola atividade sexu livre ne’e.” Dehan Prezidente INSCIDA Daniel Marçal iha Suku Maubisse Vila
Parte seluk tuir Autoridade Lokal Suku Maubisse Vila Wilson P. N. Mendonça hateten katak, sosializasaun ba loron ohin nian iha Suku ne’e rasik importante tebes tanba hanorin komunidade sira oinsa atu prevene-aan husi moras HIV-SIDA.
“Sosializasaun ba moras HIV-SIDA ne’e importante tebes ba Komunidade no foin sa’e sira atu bele hadook-aan husi moras refere nune’e kondisaun saude bele di’ak. Tanba ne’e husu ba komunidade sira atu aproveita oportunidade ida ne’e hodi partisipa maximu iha semináriu refere hodi rona informasaun sira ne’ebé partilla husi Instituto Nacional Kombate HIV-SIDA atu bele dezenvolve di’ak liután iha futuru.” Dehan Autoridade Lokal Maubisse Vila Wilson P. N. Mendonça
Nia subliña liután servisu hamutuk ho Konsellu Suku sira rona infromasaun sira ne’e atu partilla ba komunidade, Inan Aman no foin sa’e sira atu nune’e sira bele intende situasaun sira kona-ba moras HIV-SIDA, nune’e mós sira bele proteje no halo prevensaun ba moras refere tanba moras refere perigu tebes ba ema nia vida.
Reportajen : Tomas
Foto : Tomas