Dili, 22 Abril 2025 (Média Democracia) – Primeru Ministru Interinu Mariano Asanami Sabino hamutuk ho membru governu sira mai iha eskritoriu Episkopal hodi asina livru kondolensia nian, aleinde ne’e sei halo koordenasaun hamutuk ho estrutura igreja katoliku Timor-Leste kona-ba prosesu Amu Papa nia falesimentu husi mundu ida ne’e.
Primeru Ministru Interinu Mariano Asanami Sabino hateten, ohin mai iha ne’e Konsellu Ministru dekreta ona pontu importante rua, ida lutu nasional durante loron hitu, segundu bandeira hasa’e to’o de’it iha rin klaran durante loron hitu, ne’e hanesan kondilensia, respeitu hodi hakru’uk no hato’o omenajen ba santidade Papa Francisco.
“Husu ba komunidade hotu-hotu ida Dili sei reza hamutuk iha Lecidere iha Munisípiu Maliana sei reza iha Catedral Maliana no Munisípiu Baucau sei reza iha Catedral Baucau hodi kanta akompaña ba Amu Papa nia isin mate durante loron hitu nia laran hodi fó homenajen no solidariadade.” Dehan Primeru Ministru Interinu, Mariano Asanami Sabino
Nia hatutan hotu-hotu hatene horsehik iha loron 21 Abril 2025 teki-teki rona Amu Papa Francisco husik iis iha mundu ida ne’e hodi fila hikas ba nai maromak nia kadunan santu, laos de’it igreja katolika mak lakon maibé mundu tomak lakon lider ida ne’ebé promove pas estabilidade no dignidade umanu defende diretu ba kbi’it laek no lian laek sira.
Nia infulensia politika iha internasional atu orienta no konduz ba lider sira atu hakiak pas no rekonsiliasaun iha ida-idak nia nasaun. Tanba ne’e importante ba hotu-hotu maibé espesial ba Timor-Leste ne’ebé Amu Papa mai vijita iha tinan kotuk hodi fó mensajen sira ne’ebé mesak furak sei la haluha presiza hada’et ba jerasaun foun sira atu fó kontinuadade iha futuru.
“Timor-Leste illa ida ne’ebé furak no povu ne’ebé furak nafatin kontinua ho mesajen furak husi Amu Papa hatudu hahalok di’ak ba ema seluk nia matan ho umanidade hodi dignifika no respeitu malu nune’e kria pas no estabilidade iha rai laran.” Dehan nia
Nia afirma durante vijita iha Timor-Leste Amu Papa hala’o enkontru espesial hamutuk ho joven sira tanba Amu Papa hatene joven mak futuru ba nasaun ida ne’e nian, nune’e hodi halo dialogu no joven sira hodi fó mensajen importante ba joven sira katak joven hotu-hotu importante ba estadu ba nasaun no joven ida-idak sei kontribui ba Estadu ida ne’e ba oin.
“Ohin ita dekreta ona mai ita hala’o durante loron hitu nia laran ita hotu-hotu halo orasaun no kanta hodi fó homenajen ba Amu Papa. Sarani hotu iha Dili laran mai hamutuk iha Lecidere atu reza durante Amu Papa seidauk halo funebre.” Nia haktuir
Nia afirma banhira loron ne’ebé atu hakoi Amu Papa sarani hotu-hotu iha Timor-Leste sei selebra misa boot ida iha Tasi-tolu, nune’e hodi fó homenajen ba Amu Papa nia klamar sai anju iha nia mundu foun.
“Mai ita hamutuk durante loron hitu nia laran ita hanoin de’it ba Amu Papa nia mensajen no hahalok tomak hanesan mensajen espesial ba labarik ki’ik, joven, povu no lideransa hotu no partidu politika sira mai ita hamutuk atu akompaña durante semana ida hodi refleta ba mensajen ne’e atu ita bele halo politika ida ne’ebé di’ak ba povu no nasaun.” Nia informa
Nia informa katolika laos de’it hanesan ita-nia fiar maibé katolika hanesan ita-nia identidade iha priambulu konstituisaun hakerek iha ne’ebá luta katolika nian igreja hirarkia partisipa iha luta hamutuk ho povu maubere.
Esplika liután ohin governu mai hotu iha ne’e atu asina livru hodi fó kondilensia direta ba Sante-Se Estrutura Igreja Katolika nomos katolika iha mundu tomak liu-liu ba povu Timor-Leste.
Reportajen : Nelfiano
Foto : Nelfiano