Dili, 18 Jullu 2025 (Média Democracia) – Jogador husi nasaun Timor-Leste prontu atu joga hasoru Portugal no sei esforsu makas hodi bele hetan vitoria iha jogu abertura CPLP ne’ebé sei realiza iha loron sabadu, oras tuku 7:30 iha estadiu Munisipal Dili Timor-Leste, konferensia ne’e realiza iha CCD sexta-feira semana ne’e.
Iha komunikadu ne’ebé hato’o husi Official Treinador Timor-Leste Denilson G. B. Guteres hanesan treinador atu ko’alia oituan kona-ba preparasaun ba jogu abertura ba aban nian ne’ebé sei hasoru jogador sira husi nasaun Portugal, fiar katak sei hetan vitoria tanba durante ne’e treinu masimu.
“Hanesan Treinador bainhira kaer ona ekipa ida ne’e, iha mehi ne’ebé boot tenke hetan vitoria iha jogu, tanba ita sai hanesan uma nain ba jogu refere, nune’e aban ita hotu sei asisti hamutuk iha estadiu Munisipal Dili.” Dehan Official Treinador Timor-Leste Denilson G. B. Guteres
Nia informa, sira iha esperansa katak iha jogu aban nian sei hatudu valor ne’ebé boot, haree ba iha parte tekniku nomos treinu ninian prontu ona, tanba durante ne’e halo hela preparasaun ba tekniku fiziku sira ho masimu tebes.
“Jogador sira ne’ebe sei joga iha abertura aban nian, ami rekolla husi Munisipiu ida-idak ho treinamentu durante fulan haat ba lima, signifika katak preparasaun masimu ho fiziku ne’ebé di’ak, ha’u fiar katak ita sei hetan vitoria iha jogu aban nian.” Informa Official Treinador Timor-Leste
Hatutan husi Kapitaun Jogador Timor-Leste Inigo Martins Bras, Parte husi jogador sira prontu atu joga hasoru nasaun Portugal iha joga abertura no sei hetan vitoria iha jogu refere.
“Haree ba iha preparasaun durante ne’e lao ho diak nomos ami jogador sira prontu ona atu hetan vitoria kontra jogador husi nasaun Portugal, ami sei halo kontente ba iha adeptus Timoroan sira hotu ne’ebé aban sei partisipa iha jogu ne’e rasik.” Kapitaun Jogador Timor-Leste Inigo Martins Bras
Iha parte seluk hatutan husi Official Treinador husi nasaun Portugal Pedro Mota da Silva subliña kata sira prepara ona iha kualker jogu no prontu atu tuir kompetisaun joga hasoru nasaun Timor-Leste.
“Jogu ida ne’e espesiál tanba parte ida husi istória no kultura lian portugés nian no ha’u hanoin katak ida-ne’e di’ak ba istória lian portugés nian.” Subliña Official Treinador husi nasaun Portugal Pedro Mota da Silva
Nia reafirma, iha kompetisaun sira hanesan futebool nian kada treinador sempre iha esperansa tenke hetan vitoria iha jogu refere, klaru katak Timor-Leste hakarak hetan vitoria iha jogu aban no portugal mós hakarak hetan vitoria, tanba iha kompetisaun la iha ema ida hakarak lakon.
Reportajen : Domingas
Foto : Domingas