Dili, 17 Fevereiru 2025 (Média Democracia) – Konsellu Imprensa servisu hamutuk ho UNDP fó formasaun ba jornalista hamutuk tolu-nulu husi média sanulu-resin ne’en, ho tipu média hanesan, Jornal, Radio, Online no Televizaun, ho tema treinamentu mak media debate iha kontestu demokrasia, treinamentu ne’e hala’o durante loron-tolu iha salaun joão paulo II, Comoro, Dili.
Tuir Prezidente Konsellu Imprensa Otelio Ote hateten, tinan ne’e Konsellu Imprensa hahu ho ezersisiu kona-ba mundu jornalizmu iha tinan kotuk selebra ona formasaun husi UNDP suporta husi embaixada Japaun iha Munisipiu Liquisa, jornalista kuaze ema ne’en-nulu resin mak partisipa formasaun refere.
“Agradese ba iha UNDP ne’ebé kolabora di’ak ho Konsellu Imprensa hodi fó formasaun ba jornalista sira, nomos agradese ba iha reprezentante embaixada Japaun iha Timor-Leste ne’ebé apoiu fundu ba formasaun sira nomos konstrusaun edifisiu foun Rttl.Ep, ohin ita fila-fali mai iha fatin ida ne’e atu fó nafatin formasaun ba iha jornalista sira husi média sanulu-resin ne’en no jornalista nain tolu-nulu, ho tema formasaun mak “média debate iha kontestu demokrasia,” Formasaun ne’e hala’o durante loron-tolu, ho materia ne’ebé la hanesan, treinamentu ida ne’e importante tebes ba iha jornalista sira ne’ebé servisu iha televizaun nomos radio.” Dehan Prezidente Konsellu Imprensa Otelio Ote
Nia hatutan esperansa husi formasaun ne’e bele falisita di’ak liután maluk jornalista sira hodi aumenta sira-nia kapasidade iha servisu terenu nomos maluk jornalista sira bele iha vizaun ida ne’ebé di’ak liubá sira-nia servisu rasik iha instituisaun média.
Hatutan husi reprezentante UNDP iha Timor-Leste Muhamed Jaffar hateten, programa ida ne’e hanesan programa projetu ida ne’ebé importante ba iha jornalista sira, tanba durante ne’e UNDP mós fó apoiu ba iha formasaun sira ne’e atu dezenvolvimentu kapasidade jornalista sira atu bele servisu ho diak hodi bele koalia kona-ba demokrasia no boa-governasaun.
“Formasaun ohin ne’e bele fasilita di’ak liutn jornalista sira ne’ebé servisu destakadu Munisipiu nomos iha nasional atu bele hala’o kobertura ho independente hodi bele sai jornalista ida ne’ebé labele dependente ba parte seluk, husi formasaun ida ne’e mós bele aumenta kapasidade no koñesimentu jornalista ida-idak nian.” Dehan reprezentante UNDP iha Timor-Leste Muhamed Jaffar
Nia saliente, liuhusi formasaun ne’e jornalista sira bele uza didiak materia hirak ne’ebé sira hetan husi treinamentu refere nomos bele fó benefisiu masimu ba iha oportunidade ida ne’e, no uza didiak ba iha kna’ar servisu nian.
Hatutan husi reprezentante Japaun iha Timor Leste Ms. Minako Tateno hateten, debate média hanesan fundamentu husi jornalismu nian no uza hodi dada ka atrai opinãun publiku no koko mós atu proteje demokrasia iha nasaun ida ne’e.
“Ita jornalista iha responsabilidade ba publiku atu divulga informasaun ne’ebé klaru no iha kritu, nune’e iha treinamentu refere bele reforsa jornalista sira hodi halo kobertura no hakerek nutisia. Durante tinan naruk ona embaixada Japaun eziste iha Timor-Leste embaixada kontinua apoiu nafatin dezenvolvimentu média iha Timor-Leste, aleinde ne’e mós apoiu hirak ne’ebé embaixada iha laos haree deit ba fundus maibé apoiu mós liuhusi voluntariu.” Dehan reprezentante Japaun iha Timor Leste Ms. Minako Tateno
Nia hatutan espera husi formasaun ida ne’e bele kapasita di’ak liután koñesimentu no ka haklean liután maluk jornalista foin-sae sira atu bele servisu ho intelektual, nomos aplika servisu tuir saida mak hetan iha formasaun refere.
Reportajen : Domingas
Foto : Domingas