Dili, 17 Dezembru 2025 (Média Democracia) – JSMP hala’o komunikadu imprénsa kona-ba kuadru partidu polítika sira iha Munisípiu Manufahi kona-ba material lideransa transformativu, tanba material refere importante tebes no sei uza hanesan matadalan ba sira-nia lideransa iha future. Komunikadu ne’e Média Democracia asesu husi pajina JSMP, Kuarta semana ne’e.
Diretora Ezekutiva JSMP Ana Paula Marçal hateten, iha loron 11 Dezembru 2025, JSMP fó treinamentu ba kuadru partidu polítiku sira ho asuntu parlamentár ho tópiku “Lideransa Transformativa no Demokrasia iha Timor-Leste”. Atividade ne’e realiza iha salaun enkontru Munisípiu Manufahi nian no ofisialmente loke husi Sekretária Munisípiu Manufahi (Sec. PIDI). Filomena da Costa Nunes.
“JSMP iha intensaun hodi kria programa ida ne’e atu kontribui no hasa’e koñesimentu kuadru partidu polítiku sira iha área lideransa nian atu nune’e iha futuru bele dezempeña sira-nia kna’ar sira ho responsabilidade no integridade, nune’e bele kontribui efetivamente ba dezenvolvimentu nasionál.” Dehan Diretora Ezekutiva JSMP, Ana Paula Marçal
Diretora Ezekutiva JSMP hatutan, durante iha sesaun formasaun sira, partisipante sira konxiénte no konsidera katak tópiku lideransa transformativu no demokrasia iha Timor-Leste ne’ebé JSMP fornese ba sira ne’e relevante no importante tebes ba sira atu bele hariku liután sira-nia kapasidade no abilidade hanesan kuadru partidu polítiku nian.
“JSMP aprezenta matéria ho tema jerál kona-ba lideransa transformativa no demokrasia iha Timor-Leste. Matéria ne’e iha sesaun rua, sesaun dahuluk kona-ba lideransa transformativa no sesaun daruak kona-ba demokrasia iha Timor-Leste. Matéria kona-ba lideransa nian ko’alia kona-ba konseitu báziku relevante sira hanesan nasaun lideransa iha jerál, lideransa tuir péritu sira ninia hanoin/hanorin, diferensa entre líder, jestór, xefe no patraun ka boos no tipu lideransa ho nia istilus sira.” Hatutan Diretora Ezekutiva JSMP
Diretora Ezekutiva afirma, iha formasaun ne’e, partisipante sira mós livremente halo interpretasaun ba figura ka dezeñu sira relevante ba tipu no kualidade lideransa nian no sira ida-idak aprezenta sira nia hanoin no fahe koñesimentu ba malu.
Partisipante sira haree no konsidera katak matéria ne’ebé sira hetan husi JSMP diferente ho materia sira ne’ebé husi instituisaun relevante sira seluk partikularmente matéria kona-ba lideransa. Partisipante balun espresa sira-nia haksolok no espresa katak informasaun ne’ebé JSMP fornese no manual treinamentu ne’ebé JSMP distribui sai hanesan bukae no matadalan ba sira nia kna’ar hanesan líder.
Iha fatin hanesan Sekretária Munisípiu Manufahi, Filomena da Costa Nunes hateten, hodi rekomenda katak JSMP bele haluan tan formasaun lideransa sira iha Munisípiu nian tanba konsidera matéria refere importante no relevante tebes ho sira-nia servisu.
“Totál partisipante sira ne’ebé partisipa iha atividade ne’e mak hamutuk 20 ne’ebé kompostu husi membru kuadru partidu polítiku sanulu resin-lima nomos membru pesoál sira Munisípiu Manufahi nian. Membru kuadru partidu sira hanesan Fretilin na’in 5, CNRT na’in 2, PD na’in 4, PLP na’in 3 no KHUNTO na’in 1.” Dehan Sekretária Munisípiu Manufahi, Filomena da Costa Nunes
Esplika liután atividade ne’e realiza ho kolaborasaun, parseria no apoiu finanseiru husi Gabinete Apoiu Sosiedade Sivíl (GASC), no Gabinete Vise-Primeiru Ministru, Koordenadór ba Asuntu Sosiál, Ministru Dezenvolvimentu Rurál no Abitasaun Komunitária, Governu Konstitusionál IX.
Reportajen : Nelfiano
Foto : Media JSMP