Dili, 14 Agostu 2025 (Média Democracia) – JSMP realiza komunikadu imprénsa kona-ba ofendida kazu Violensia Domestika kontente ho julgamentu movel, tanba hamenus gastu viajen, nune’e husu ba tribunal movel kontinua hala’o iha Munisípiu. Konferensia ne’e Média Democracia asesu liuhusi pajina JSMP, Kinta semana ne’e.
Diretora Ezekutiva JSMP, Ana Paula Marçal hateten iha Konferensia Imprensa katak iha 21 to’o 24 Jullu tinan 2025, Tribunal Judisiál Primeira Instánsia Suai kontinua hala’o julgamentu movel iha Munisípiu Bobonaro.
“Iha julgamentu movel ne’e, JSMP aprosima no konversa ho ofendida husi kazu ofensa ba integridade fízika simples ho natureza Violénsia Doméstika (VD) no ofendida informa ba JSMP katak antes ne’e nia ho nia la’en iha kazu seluk ne’ebé julga ona iha Tribunál Judisiál Primeira Instánsia Suai. Iha kazu anterior ne’e, ofendida relembra katak nia ho ninia la’en tenke gasta osan hodi aluga karreta ba mai ho osan US$250.00, hodi bele tuir julgamentu, maibé hafoin liuhusi julgamentu movel iha Munisípiu Bobonaro ofendida sente kontente tanba bele redus ona orsamentu no selu de’it ojek US$5.00 ba mai atu tuir julgamentu.” Dehan Diretóra Ezekutiva JSMP, Ana Paula Marçal
Diretora Ezekutiva JSMP hatutan, ofendida rekomenda ba Tribunál Judisiál Primeira Instánsia Suai atu nafatin hala’o julgamentu movel, nune’e membru komunidade sira ne’ebé kbiit la’ek labele lakon osan barak ba transporte hodi tuir julgamentu.
“JSMP apresia ho programa tribunál movel no husu ba Tribunál Primeira Instánsia sira hotu atu kontinua realiza julgamentu movel iha Munisípiu sira ne’ebé laiha tribunál permanente, nune’e aleinde redus kazu pendente sira maibé bele mós ajuda hamenus gastu viajen nian (liu-liu transporte) husi interveniente sira liu-liu ofendidu/a no testemuña sira hanesan saida mak ofendida VD ne’e mensiona.” Diretora Ezekutiva JSMP
Diretora informa, iha julgamentu movel ne’e, JSMP konsege monitoriza kazu ho totál hamutuk 15. Husi totál kazu ne’e konstitui kazu violénsia bazeia ba jéneru (VBJ) hamutuk haat (4), kazu kontrabandu hamutuk walu 8, danu simples ida (1), kazu ameasa ida (1) no furtu agravadu ida (1). Kazu hirak ne’ebé julga durante julgamentu movel hetan hotu ona desizaun.
“Husi totál kazu 15 ne’ebé hetan hotu ona desizaun, hanesan krime ofensa ba integridade fízika simples natureza VD tolu (3) kondena ho pena multa US$45.00, enkuantu krime ofensa ba integridade fízika simples natureza VD ida (1) kondena ho pena prizaun fulan 6 suspende ba tinan ida.” Informa Diretóra Ezekutiva JSMP, Ana Paula Marçal
Nia afirma, iha parte seluk ba krime kontrabandu sira iha lima (5) mak tribunal kondena ho pena multa US$60.00, kazu ida (1) seluk kondena ho pena multa US$80.00, no ida (1) tan kondena ho pena multa US$120.00, no absolve ida (1). Entretantu ba krime ameasa ida (1) no danu simples ida (1) respetivamente tribunál omologa pedidu dezisténsia keixa, no ba krime furtu agravadu ida (1) absolve.
Esplika liután relasiona JSMP nia observasaun jerál durante kona-ba julgamentu movel ne’e, parte interveniente sira koopera tebes no marka prezensa tuir oras ne’ebé tribunál marka ona tuir data no oráriu julgamentu. Nune’e JSMP husu atu tribunal kontinua hala’o iha teritoriu hotu bele hamenus gastu osan viajen nia ba Munisípiu.
Reportajen : Nelfiano
Foto : Media JSMP