Dili, 09 Maiu 2025 (Média Democracia) – Programa Monitorizasaun Sistema Judisial (JSMP sigla inglés), konsidera nomeiasaun bá Prezidente Tribunál Rekursu foun ne’e konstitui rekejitu legál balun preve iha Lei kona-ba Estatutu Majistratura Judisiál no Lei Organizasaun Judisiáriu. Atividades kamunikadu ne’e Média Democracia asesu husi pájina facebook JSMP iha Kinta semana ne’e.
Diretora Ezekutiva JSMP, Ana Paula Marçal hateten, iha komunikadu imprensa haree ba loron 29 Abril 2025, Prezidente Repúblika liuhusi Dekretu-Prezidente Nú. 35/2025 nomeia Meritísimu Juis Dr. Afonso Carmona nu’udar Prezidente Tribunál Rekursu foun hodi substitui Meritísimu Juis Konselleru Dr. Deolindo dos Santos ne’ebé termina ona ninia mandatu iha 29 Abril 2025.
“Nomeasaun ne’e hamosu reazen pro-kontra oioin iha nível sosiedade hotu-hotu, partikularmente, sosiedade sivíl, akademista, jurista sira, bankada opozisaun parlamentár no ikus liu Meritísima Juiza Maria Natercia Gusmão Pereira, nu’udar juisa Konselleira ida husi Tribunál Rekursu (TR), aprezenta petisaun insiál-providénsia kautelár kontra Prezidente Repúblika ba nomeasaun ne’e.” Dehan Diretora Ezekutiva JSMP, Ana Paula Marçal,
Nia hatutan nomeasaun ba Prezidente Tribunál Rekursu foun ne’e, tuir JSMP nia haree, mezmu la’o di’ak ona, maibé sei konstitui inkumprimentu ba rekézitu legál sira balun ne’ebé preve iha Lei kona-ba Estatutu Majistratura Judisiál no Lei Organizasaun Judisiária, ne’ebé iha futuru presiza haree didi’ak no kumpri atu evita polémika iha públiku nia leet.
“Iha provizaun pontu 2) Artigu 76⁰ A lei númeru. 25/2021 ne’ebé altera ho Lei númeru. 12/2022 no Lei Númeru. 4/2025 kona-ba Lei Organizasaun Judisiáriu preve katak durasaun mínima ba esperiénsia servisu profisionál ba juis ne’ebé bele nomeia ba Prezidente Tribunál Rekursu mak tinan 20 iha área majistratura judisiál, la inklui majistratura Ministériu Públiku.” Dehan Diretora Ezekutiva JSMP
Nia haktuir iha provizaun artigu 59 no 63 Lei Númeru. 5/2022 kona-ba Estatutu Majistratura Judisiál preve kona-ba kategoria juis sira ne’ebé bele asesu ba iha Tibunál Rekursu (TR) no Supremu Tribunál Justisa (STJ). Iha TR, juis Segunda Klase bele asesu ba TR bainhira juis Primeira Klase laiha, se juis Primeira Klase iha, sei laiha dalan ba juis Segunda Klase atu bele asesu ba TR. Iha STJ nian, juis Primeira Klase bele asesu ba iha STJ bainhira laiha juis Desembargadór no sei iha juis Desembargadór, laiha dalan ba juis Primeira Klase atu asesu ba iha STJ.
“JSMP hanoin Prezidente Repúblika labele halo nomeasaun ba juis Segunda Klase atu ba asume kargu PTR, entre juis sira, sei iha juis ho kategoria Primeira Klase. Bainhira laiha juis Primeira Klase, juis Segunda Klase mak nomeadu no asume kargu PTR, nia labele ezerse tan kna’ar PSTJ, tanba kategoria juis ne’ebé bele asesu ba STJ ne’e tenke juis Desembargadór ho juis Primeira Klase, tanba ne’e tuir JSMP nia haree, juis ideal ne’ebé bele nomeia atu prezide TR no STJ mak juis ho kategoria Desembargadór no Konselleiru.” Hateten Diretora Ezekutiva JSMP
Nia afirma bainhira atu ultrapasa bareira ka rekezitu legál sira no iha autoridade naton hodi prezide TR no STJ ho nia membru sira ne’ebé ho kategoria juis Primeira Klase, Desembargadór no Konselleiru.
Esplika liután haree ba situasaun atuál relativamente ba polémika no kestaun rekézitu legál aprezenta iha leten, JSMP rekomenda atu nomeasaun sira iha futuru presiza nomeia de’it entre juis sira ne’ebé asesu ona ba TR no STJ, inklui kedas fraze ne’e iha provizaun Artigu 76 aliñea A Lei Organizasaun Judisiária atu bele iha baze legál. JSMP mós hato’o kongratulasaun ba Meritísimu Juis Afonsa Carmona, PTR foun espera bele hala’o kna’ar ho di’ak hodi kontribui hadia mekanizmu nomeasaun iha futuru ba setór justisa.
Reportajen : Nelfiano
Foto : Media JSMP