Dili, 26 Fevereiru 2026 (Média Democracia) – Reprezentante Kadetes foun PNTL 2025 halo ona karta petisaun ba Ministeiru Interior (MI) no Primeiru Ministru (PM) maibé seidauk iha rezultadu ne’ebé di’ak kona-ba anula total teste kadetes foun tinan 2025.
Reprezentante Kadetese foun PNTL Cejerisio Ramos hateten, karta petisaun ne’ebé hatama ona ba iha Parlamentu Nasional (PN) no Primeiru Ministru (PM), liu-liu iha kadetes Foun PNTL tenki anula total.
“Relasiona ho polemika ne’ebé kandidatu sira hasoru hanesan reprezentante porta-voz, ami mai ho ami nia pozisaun katak anula total ba desijaun prosesu rekrutamentu, nune’e bele responde ba ezizensia kandidatu nian, tanba tuir mós ami karta petisaun ne’ebé hatama ba Parlamentu Nasional no Krimeiru Ministru atu anula total, depois estabelese komisaun independente husi internasional tanba komisaun anterior ne’e kria injustisa no diskriminasaun. Nu’udar povo, ami nia pozisaun maka ami junta ho forsa EUTL halo vizilansia prosesu tomak ne’ebé agora daudaun suspende ba 20 dias.” Dehan Reprezentante kadetes foun PNTL Cejerisio Ramos
Reprezentante kadetes foun hatutan, desizaun refere maka sai la tuir kadetes foun PNTL nia hakarak maka sira sei halo ultimu rekursu no halo asaun pasifikasaun hasoru Ministeiru Interior no Primeiru Ministru, tanba tuir Kadetes Foun PNTL sira nia observa katak Diploma Ministerial ne’e traisaun bo’ot ba povo no ba sidadaun hotu.
“Ami kontra ne’e laos kontra sujeitu ida, maibé ami kontra sistema ne’e atu kombate agora, nune’e ba oin labele akontese tan, entaun ami mai ho pozisaun ne’ebé klaru hodi husu ba Primeiru Ministru no Ministru Interior tenki toma desijaun ne’ebé adekuadu no tenki anula total tuir ezizensia ne’ebé ami hakarak.” Afirma Reprezentante kadetes Foun PNTL
Reprezentante ne’e reafirma tan, Se la anula total maka sira sei halo asaun pasifikasaun hasoru Primeiru Ministru no Ministeiru Interior, nune’e husu ba PM no Ministeiru Interior tenki tetu didi’ak antes foti desizaun, no kadetes foun lakoi desizaun ne’ebé kria injustisa.
Entretantu Reprezentante Kadetes Foun PNTL ne’e husu ba Konsellu Ministru toma desizaun karik 20 dias ne’e foti desizaun ne’ebé adekuadu tenki anula total ba karta petisaun ne’ebé submete ona, se la anula total maka kadetes foun PNTL sei halo asaun pasifikasaun hasoru Primeiru Ministru no Ministeiru Interior.
Reportajem : Estajiadu Marito
Foto : Marito