Dili, 23 Janeiru 2025 (Média Democracia) – Kominsaun Anti Korupsaun (CAC-sigla Portugues) realiza semináriu nasional ba kargu Diretores no Xefia sira husi liñas Ministeriais kona-ba Medida Prevensaun ba Kombate Korupsaun (MPCC-sigla portugues), ho tema “Hasa’e Koñesimentu Ajente Publiku Ba Rejime Deklarasaun Rikusoin”, ne’ebé hetan abertura husi Ministra Solidariedade Sosial no Inkluzaun.
Iha entrevista Ministra Solidariedade Sosial no Inkluzaun, Verónica das Dores agradese ba Komisáriu Komisaun Anti Korupsaun ne’ebé disponivel halo sosializasaun atu nune’e públiku bele komprende hodi servisu tuir koridór.
“Agradese ba komisariu sira iha tempu ohin bele halo ona sosializasaun kona-ba programa anti korupsaun, ita presiza halo sosializasaun para hotu-hotu bele komprende oinsa mak ita bele servisu la’o tuir koridor ida ne’ebé diak.” Dehan Ministra Verónica ba jornalista sira iha Salaun MSSI Kinta ne’e.
Iha biban ne’e Komisáriu Komisaun Anti Korupsaun Rui Perreira dos Santos hatutan Atividade ne’e halo sensibilizasaun ba kargu xefia no kargu diretór sira kona-ba servisu KAK nian.
“Importante liu prezensa kargu xefia sira ne’e mai, oinsa informasaun sira ne’e ba iha Ministériu ida-idak, Asesór nasionál sira, kargu xefia sira oinsá bele ba rejista sira-nia rikusoin, ida ne’e mak servisu ohin loron.” Dehan Komisáriu Rui ba jornalista sira
Tanba tinan kotuk iha Ministériu balun, inklui Ministériu Interior lubuk ida mak kona penalti ho total 400 resin, ne’e iha balu mak halo reklamasaun ba KAK ne’ebé balun konsidera no balun komisaun la konsidera, tanba ne’e espera tinan ne’e ho atividade ne’ebé hala’o, kargu xefia sira nomos iha Gabinete Ministériu. Tan ne’e nia espera katak tinan ida ne’e asesór sira nomos iha parlamentu nasionál ne’ebé tinan kotuk la tama ba rejistu rikusoin, mas tinan ne’e sira tenke ba rejistu no hatene-an katak nia Asesór Nasionál tenke iha obrigasaun atu ba rejistu rikusoin iha parte relevante sira.
“Tanba ne’e mak ami sei tur hamutuk ho sira, tanba sa mak ema 80 resin ne’e seidauk ko’a sira-nia 25 ne’e, maibé se la ko’a fulan kotuk, fulan ne’e dalaruma ami implementa, maibé ami presiza hetan justifikasaun husi Ministeriu Finansas tanba sa lista husi 400 resin ne’e 80 la hetan ko’a, se mak autoriza la hetan ko’a.” Nia afirma
Entretantu iha semináriu ne’e hetan partisipasaun husi liña Ministeriais hotu hahú husi kargu Diretór Jerál, Diretór Nasionál, Xede Departamentu no Funsionáriu sira.
Reportajen : Estefania
Foto : Estefania