Dili, 06 Fevereiru 2026 (Média Democracia) – Bazeia ba rezultadu ne’ebé fó sai husi Komisaun rekrutamentu ba kandidatu kadetez PNTL foun ne’ebé hamosu konfuzaun ba públiku, nune’e kandidatu ne’ebé la pasa ba iha faze teste saúde nian halo barullu iha edifísiu Ministériu Interior nia oin hodi ejiji ba irregularidade ne’ebé akontese ba sira.
“Ami mai iha fatin ida ne’e atu hato’o ami nia ejijensia bazeia ba rezultadu ne’ebé akontese la tuir ami nia hakarak, iha ami nia esforsu durante ne’e ami sente rezultadu la apar ho ami nia esforsu, tanba ne’e ami hato’o ami nia ejijensia.” Dehan Reprezentante kandidatu kadetes PNTL foun, Deolando Yano Mendonça ba jornalista sira iha edifísiu Ministériu Interior nia oin kuarta ne’e (04/02)
Deolando nia observasaun hodi nota katak iha sistema balun la’o ladún di’ak no mosu deskriminasaun tanba viola ema seluk nia direitu.
“Ita haree ba prosesu sira ne’e toma nota kedas katak iha sistema balun ne’ebé la di’ak no la tuir ita-nia hanoin no deskriminasaun fali ba direitu ita ema nian, tanba rekrutamentu ne’e ba ema hotu, bainhira nia esforsu bele mak fó sai la tuir nia hakarak normal nia tenke mai komplein, tanba ne’e nia direitu.” Afirma Reprezentante kandidatu kadetes PNTL foun, Deolando Yano Mendonça
Iha fatin seluk, Ministru Interiór Francisco da Costa Guterres hateten, Governu fó loron sanulu ba kandidatu vaga rekrutamentu menbru PNTL foun 2025 atu hato’o kontestasaun karik lamenta ho prosesu rekrutamentu liu-liu liga ho lista vaga rekrutamentu menbru PNTL foun.
“Ha’u fó loron 10 ba kandidatu atu halo reklama, hafoin ida ne’e mak ita haree didi’ak tok. Iha komisaun ida mós halo hela monitorizasaun fiskalizasaun no verifikasaun, nune’e ita simu tiha relatóriu hodi haree didi’ak lai, karik iha problema ruma mak ita hadia tutuir.” Dehan Ministru Interiór Francisco hateten ba jornalista sira bainhira remata reuniaun Konsellu Ministru iha Palásiu Governu, kuarta feira semana ne’e
Ministru ne’e hatutan, kuandu iha reklamasaun Governu sei haree didi’ak ho hadia, tanba ne’e nafatin husu konkorente hato’o reklamasaun mai.
“Reklamasaun tama hotu ona mak ita haree no verifika lolos tok, nune’e ita bele hatene falla duni iha buat balun kalae, ka keta iha ema balun laran moras, maibé ita sei haree iha prosesu reklamasaun ne’e, nune’e ha’u afirma nafatin ba kokorente sira loron sanulu hodi halo reklamasaun.” Hatutan Ministru Interiór
Ministru ne’e reafirma, kokorente sira iha oportunidade loron sanulu halo reklamasaun, iha ne’ebá regra ita hatama mai ne’e Governu haree, hanesan sidadaun tenke kumpre regra. Namdigas ema rihun ida konkore vaga ruanulu hotu-hotu hakarak liu.
“Ita labele elemina ema iha parte ida de’it, no rekrutamentu ne’e labele haree de’it ema nia kapasidade, haree mós ba parte seluk, karik nia halai ladun di’ak ka nia valor menus iha teste seluk, tanba iha kriteria teste ne’e fahe ba parte haat, nune’e valor sira ne’e akumula husi kriteria teste haat ne’e nian hodi hatene lolos rezultadu ikus.” Reafirma Ministru Interiór
Ministru ne’e lembra, iha teste dalabarak hetan ema di’ak, maibé tenke soe nia iha klaran tanba falla ki’ik koan oan ida de’it, entaun rekrutamentu ne’e buka akomulativu atu rezolve problema. Laiha ona oportunidade ba sira ne’ebé hamutuk rihun sanulu resin no la submete ba teste médiku tanba sira ne’e valór mak la to’o.
“Governu foti sira hamutuk 400 ne’e ba uluk teste médiku, primeiru atu sira ba halo ona formasaun tanba vaga ne’ebé sira fó ne’e 400 de’it, ida ne’ebé mellores husi númeru ida to’o 400 ne’e submete ba teste médiku, ne’e lei mak dehan kedas.
Esplika liután desizaun ne’ebé Governu foti ne’e mak sira rihun sanulu sei la foti hotu no ko’alia loloos ne’e nune’e duni. Kuandu sira ne’ebé husi atus haat ne’e la pasa mak sei foti fali husi númeru ordinariu atus haat ida. Teste husi kandidatu na’in 400 Governu sei haree hodi halo desizaun ruma, kuandu iha posibilidade ruma ita bele avansa ho sira. Kona-ba regra polísia nia oan iha direitu tama iha rekrutamentu ne’e no veteranu nia oan kouta pursentu ruanulu ne’e la eziste iha ne’e, komisaun hasai, tanba ida ne’e Tribunál konsidera inkonstituisionál.
Reportajen : Nelfiano
Foto : Nelfiano