Díli, 22 Janeiru 2025 (Média Democracia) – Konsellu Imprensa K.I asina akordu ho Autoridade Nacional de Comunicação (ANC) hodi hametin Liberdade Imprensa no Liberdade Espresaun iha Timor-Leste, asina akordu ne’e hala’o iha salaun konsellu Imprensa, Quintal-Boot Díli.
Iha entrevista ho Prezidente Konsellu Imprensa Otelio Ote hateten, asina akordu ohin ne’ebé hala’o ona husi orgaun rua ne’e atu simplifika di’ak liután kona-ba prosesu mekanismu sira atu registu meius komunikasaun sosial sira iha nasaun ne’e rasik.
“Objetivu primeiru husi asina akordu husi orgaun rua ne’e atu halo koordenasaun metin hodi halo verifikasaun didiak kona-ba meius komunikasun sosial sira ne’ebé atu registu iha konsellu imprensa nomos meius komunikasaun sosial sira liu-liu ba iha radiu no televizaun atu registu iha ANC, objetivu segundu oinsa bele asegura asesu informasaun ba ema hotu-hotu, se ita bele fó lisensa ba radiu no televizaun ita asegura instituisaun informasaun nian ba ema hotu, tan ne’e ita hatene Konsellu Imprensa durante ne’e iha mós problema tekniku oituan kona-ba oinsa atu hala’o verifikasaun ba iha radiu no televizaun sira, haree liubá iha radiu sira ohin asina akordu ne’e atu haree di’ak liubá iha mekanismu hirak ne’e, ita hatene katak iha televizaun ida ka rua durante ne’e seidauk mai halo registu iha Konsellu Imprensa rasik tanba sei presiza nia baze legal nomos regra ka rekezitus sira ne’ebé los no tenke halo konfirmasaun ho ANC.” Lia-hirak ne’e hato’o husi Prezidente Konsellu Imprensa Otelio Ote, iha salaun K.I
Nia informa haree ba iha rekezitus ne’ebé radiu ho televizaun sei halo tuir bainhira atu mai registu iha Konsellu Imprensa tenke liuhusi ANC tanba ANC mak sei atende no halo identifikasaun kona-ba rekezitus hirak ne’e, mai fali iha Konsellu Imprensa nia pozisaun atu halo atendementu de’it ba iha registrasaun nian
Hatutan husi Prezidente Autoridade Nacional de Comunicação (ANC) Flavio da Costa hateten, husi parte ANC rasik asina akordu ida ohin hanoin katak ida ne’e pasu importante ida ba Konsellu Imprensa no ANC atu haree diak liu nivel fó lisensa ba ema sira ne’ebé atu harii tan média iha nasaun Timor-Leste hanesan Radio no Televizaun, ANC nia kna’ar haree liubá iha parte tekniku nian hodi atende no fahe aspektu sira ne’e ba nain media sira bele uza iha sira-nia servisu loron-loron.
“Asina akordu ida ohin ne’e ha’u hanoin Autoridade Nacional de Comunicação (ANC) sei halo koordenasaun diak liután ho Konsellu Imprensa rasik atu haree ba iha se de’it mak atu hala’o atividade jornalistiku nian hanesan loke tan média tenke liuhusi dalan legal hanesan registu iha Konsellu Imprensa, karik Konsellu imprensa dehan média ne’e merese legaliza ona entaun ANC prontu atu haree ba iha tekniku atu nunee bele fasilita di’ak liután média refere.” Lia-hirak ne’e hato’o husi Prezidente Autoridade Nacional de Comunicação (ANC) Flavio da Costa iha resintu K.I
Nia hatutan ANC ho Konsellu Imprensa sei ko’alia kle’an liután kona-ba posivel ka lae atu loke radiu no televizaun estranjeiru iha nasaun ne’e, hanoin katak ne’e parte rua sei servisu hamutuk hodi ko’alia mós kona-ba ne’e no sei buka mós mekanismu ida ne’ebé di’ak atu bele estabelese iha rai ida ne’e
“Ita nia objetivu husi asina akordu ida ne’e atu fasilita di’ak liután media sira, nune’e ema ne’ebé asesu ba iha informasaun ne’e seguru no kontente, laos ema asesu informasaun uza meius ida ne’ebé prezudika fali ema seluk, husi parte ANC sente kontente tebes tanba bele servisu hamutuk ho Konsellu Imprensa hodi haree ba iha média sira, tanba agora ne’e dezenvolvimentu meius komunikasaun ne’e mosu oioin entaun radiu no televizaun balun uza live streaming de’it tanba ne’e iha dezenvolvimentu sira hanesan ne’e ita mak tenke prepara nomos ita tenke buka mekanismu husi parte rua, no oinsa mak bele aplika iha rai ida ne’e.” Tenik Prezidente Autoridade Nacional de Comunicação (ANC) Flavio da Costa
Nia salienta husi asina nota ohin ne’e esperansa orgaun rua sei servisu ho komitmentu ne’ebé iha atu haree ba iha média sira ne’ebé iha nasaun ne’e no sei servisu hamutuk diak liután ba futuru nomos bele kria ambiente ida ne’ebé diak ba iha meius komunikasaun.
Reportajen : Domingas
Foto : Domingas